Aqparat mınıstrligi «Mataevtyń isi» boıynsha sot aıaqtalǵan soń óz ustanymyn bildiredi

ASTANA. QazAqparat - Búgin Astanada ótken sarapshylar kezdesýinde QR Aqparat jáne kommýnıkatsııalar mınıstri Dáýren Abaev "Mataevtyń isine" qatysty pikir bildirdi.

Onyń aıtýynsha, aldaǵy eki aıdyń ishinde aqparattyq saladaǵy memlekettik tapsyrys júıesine ózgerister engiziledi. Al buqaralyq aqparat quraldarynyń jumysyn baǵalaýdyń jańa reıtınginde múldem basqa kórsetkishterge basymdyq beriledi, dep xabarlaıdy QazAqparat.

"Biz Mataev pen Ǵabdýllın týraly anyq-qanyǵyn bilemiz. Memlekettik tapsyrystan (avt. - istiń) bolǵanyn da jaqsy bilemiz. Sondyqtan sottyń sheshimi shyqqannan keıin ol týraly ashyq aıtýǵa quqyǵymyz bolatyn shyǵar. Bul jóninde ashyq aıtatyn bolamyz", - dep atap kórsetti D.Abaev.

Mınıstrdiń aıtýynsha, kelesi jyly qańtar aıynyń sońyna deıin memlekettik tapsyrystyń jańa júıesi tanystyrylady. "Biz búkil problemany bilemiz - tarıf qandaı, kimniń qansha beretinin, nelikten beretinin. Qazir ony jan-jaqty zerdelep jatyrmyz. Eki aıdan keıin men jańa júıe týraly baıandap beremin. Ony birden iske asyrý qıyn bolatyn shyǵar. Biraq biz ashyqtyqty barynsha qamtamasyz etetin bolamyz", - deıdi D.Abaev.

Sondaı-aq qazirgi kezde buqaralyq aqparat quraldarynyń jumysyn baǵalaıtyn jańa reıtıngtik kompanııany qurý jumystary atqarylyp jatyr. Oǵan sáıkes, memlekettik tapsyrysty oryndaý basty kórsetkish retinde belgilenedi.