Aqparat mınıstrligi izdeý júıeleri men izdeý júıesiniń operatorlaryna zańnamalyq anyqtama berýdi usyndy

NUR-SULTAN. QazAqparat – QR Aqparat jáne qoǵamdyq damý mınıstrligi ınternettegi izdeý júıeleri men izdeý júıesiniń operatorlaryna zańnamalyq anyqtama berýdi josparlap otyr. Vıtse-mınıstr Kemelbek Oıshybaev elordada ótip jatqan buqaralyq medıany zańnamalyq retteý týraly konferentsııada osyndaı málimet aıtty, dep habarlaıdy QazAqparat tilshisi.

«Mınıstrliktiń qaraýynda jatqan jáne bizdiń kózqarasymyz boıynsha, zańnamaǵa enýi qajet máselelerge toqtalǵym keledi. Olardyń keıbireýleri boıynsha usynystar tujyrymdalǵan, biraq túpkilikti sheshim qabyldandy deýge erte. Óıtkeni kópshiliktiń talqysynan ótken joq. Sondaı-aq basqa memlekettik organdarmen kelisý talap etiledi», - degen vıtse-mınıstr ınternet arqyly kontent taratý máselelerin qoldanystaǵy zańnamada naqtylap, shekarasyn belgileý mańyzdy máselege aınalyp otyrǵanyn atady.

«Atap aıtqanda, ınternet-teleradıo habarlaryn taratý operatory, onlaın formattaǵy teleradıo habar taratý operatory, aýdıovızýaldy onlaın-platforma degen ne deıtin suraqtarǵa jaýap berilýi kerek? Olar bir-birinen nesimen erekshelenedi? Іzdeý júıeleri men izdeý júıesiniń operatorlaryna zańnamalyq anyqtamalar berý kerek pe? Jelilik basylymdar uǵymyn neǵurlym naqtylaı túsý qajet. Áleýmettik jelidegi akkaýnttar men arnalar aqparatty jappaı taratý quraldarynyń birine aınaldy. Olardy buqaralyq aqparat quraldarynyń qaı sanatyna jatqyzýǵa bolady? Mınıstrlik osy baǵyttardyń barlyǵyna jańasha túsinik berýdi usynady. Qazir biz jumys tobynyń qaraýyna engizetin tujyrymdamalar ázirlep jatyrmyz», - dedi mınıstrdiń orynbasary.