Aqparat quraldaryndaǵy tilge jáne ózge de máselelerge qatysty zańnama talaptarynyń oryndalýy jiti nazarda bolady - Bas prokýratýra

ASTANA. Qarashanyń 26-sy. QazAqparat /Aıdar Ospanalıev/ - Buqaralyq aqparat quraldarynda memlekettik til saıasatynyń jáne «Qazaqstan Respýblıkasynyń tilder týraly» zańynyń saqtalýyna monıtorıng júrgizý máselesin Bas prokýratýra da baqylap otyr.

Bul baǵytta prokýratýra organdary aqparat quraldaryndaǵy tilge qatysty ǵana emes, ózge de zańdardyń saqtalýyn qadaǵalaýda. Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.

Onyń aıtýynsha, qandaı da bir aqparat quraly tarapynan elimizdiń zańdarynyń buzylýyna jol berilse, prokýratýra tıisti memlekettik organdarǵa tapsyrmalar berip, zańdy buzǵan mekeme men olardyń menshik ıelerin jaýapqa tartý jóninde jumystar júrgizip otyr. «Al Elbasynyń tapsyrmasynan keıin bul baǵyttaǵy jumystar jiti nazarǵa alynady. Tilge qatysty zańnama talaptary buzylǵan jaǵdaıda aqparat quralyna onyń menshik ıesine qaramastan, zańmen belgilengen jaýapkershilik júkteledi», dedi resmı ókil.