Aqpan men naýryzda sý tasýy múmkin - Ekologııa mınıstri
«Topyraqtyń kúzgi ylǵaldylyǵynyń kórsetkishteri kelesideı. Ortasha kópjyldyq mánderden joǵary: Aqmola, Soltústik Qazaqstan, Qostanaı, Atyraý, Aqtóbe jáne Batys Qazaqstan oblystarynda. Qaraǵandy, Ulytaý, Aqmola oblysynyń jekelegen ózenderinde jáne Aqtóbe oblysynda tómen kórsetkishter baıqalady. Sonymen qatar, Batys Qazaqstan, Atyraý jáne Aqtóbe oblystarynda topyraqtyń qatý tereńdigi byltyrǵy kórsetkishterden orta eseppen 7-den 35 sm-ge deıin joǵary. Qaraǵandy, Aqmola, Soltústik Qazaqstan jáne Qostanaı oblystarynda ótken jylǵy kórsetkishterden orta eseppen 7-den 59 sm-ge deıin tómen. Joǵaryda atalǵan faktorlardy eskere otyryp, aqpan jáne naýryz aılarynda temperatýranyń kúrt kóterilýi jáne qatty jańbyr bolǵan jaǵdaıda sý tasqyny paıda bolýy múmkin», - dedi Zúlfııa Súleımenova.
Onyń atap ótýinshe, aldyn ala boljamǵa sáıkes, aqpan aıynda respýblıkanyń basym bóligindegi aýa temperatýrasy klımattyq normaǵa jaqyn, Qazaqstannyń qıyr ońtústiginde-normadan 1°S joǵary bolady. Aqpan aıynda jaýyn-shashyn mólsheri respýblıkanyń basym bóliginde normaǵa jýyqtaıdy. Al Atyraý, Mańǵystaý, Batys Qazaqstan, Aqtóbe jáne Qostanaı oblystarynyń batysynda normadan az, Túrkistan oblysynda normadan kóp bolady dep boljanady. Qyzylorda, Jambyl oblystarynyń basym bóliginde, Almaty, Jetisý oblystarynyń ońtústik jartysynda normadan az bolady dep joramaldanady.
«Aldyn ala boljamǵa sáıkes naýryz aıynda respýblıkanyń basym bóliginde aýa temperatýrasy klımattyq normaǵa, batys óńirlerde - 1° normadan joǵary, normadan 1° tómen - eldiń ońtústik aımaqtarynyń soltústik-shyǵysynda, ortalyǵynda jáne soltústiginde baıqalady», - dedi ol.