Aqordadaǵy keńeste qamaýdaǵy adamdardy eńbekpen qamtýdy uıymdastyrý tásilderin engizý týraly sheshim qabyldandy

ASTANA. QazAqparat - Búgin Qazaqstan Respýblıkasy Prezıdentiniń kómekshisi - Qaýipsizdik Keńesiniń hatshysy Nurlan Ermekbaevtyń tóraǵalyǵymen qylmystyq-atqarý júıesin jetildirý máselesi jónindegi ýákiletti memlekettik organdar basshylary qatysqan keńes ótti.

Bul týraly Aqordanyń baspasóz qyzmeti habarlady.

Keńes barysynda 5 ınstıtýtsıonaldyq reformany júzege asyrýǵa arnalǵan «100 naqty qadamdy» oryndaý aıasynda qamaýdaǵy adamdardy kameralarda ustaýǵa kóshý jáne olardy jumyspen qamtý maqsatymen túzetý mekemelerin jańǵyrtý isine qatysty Memleket basshysy tapsyrmalarynyń oryndalý barysy qaraldy.

Jańa qylmystyq zańnama sanktsııalardyń jazalaýshylyq sıpatyn báseńdetýge jáne kóp jaǵdaıda bas bostandyǵynan aıyrýdan ózge jazalardy qoldanýǵa múmkindik berdi. Nátıjesinde alǵash ret túrme kontıngenti 41 myńǵa deıin azaıdy. 2001 jyly túzetý mekemelerinde 88 myńnan astam adam bolǵan.

Qazirgi kezde qoldanylyp júrgen qamaýdaǵy adamdardy jasaqtyq-baraktyq negizde ustaý tájirıbesi jazanyń tárbıelik áserin tómendetedi jáne krımınaldyq keleńsiz daǵdylardy joıýǵa yqpal etpeıdi. Bul problemany sheshý úshin kameralarda ustaıtyn túzetý mekemelerin paıdalaný qajet.

Qamaýdaǵy adamdardy jumyspen qamtýǵa qatysty bul kórsetkish sońǵy 10 jylda 50 paıyzdan aspaǵany atap ótildi. Sottalǵandardy eńbekpen qamtý kesilgen jazanyń tıimdiligin arttyrýǵa múmkindik beredi, sondaı-aq olardy turaqty kirispen qamtamasyz etedi. Bul tabysty olardyń qylmysy arqyly keltirgen zııanyn óteýge baǵyttaýǵa bolady.

Osyǵan baılanysty qamaýdaǵy adamdardy eńbekpen qamtýdy uıymdastyrýdyń jańa túrleri men tásilderin, onyń ishinde eńbekke yntalandyratyn qosymsha sharalar engizý qajettigi týraly sheshim qabyldandy.

Sondaı-aq túzetý mekemelerinen bosatylǵan adamdardy áleýmettik beıimdeý júıesin damytý baǵyttary talqylandy.

Keńes qorytyndysy boıynsha memlekettik organdarǵa birqatar tapsyrmalar men usynymdar berildi.