Aqordada Qarashyǵanaqta qýaty 4 mlrd tekshe metr gaz óńdeý zaýytyn salý máselesi talqylandy

ASTANA. QazAqparat - Prezıdent Eni S.p.A kompanııasynyń bas atqarýshy dırektory Klaýdıo Deskaltsıdi qabyldady. Kezdesý barysynda kompanııanyń Qazaqstandaǵy qyzmetine qatysty máseleler, sondaı-aq Qashaǵan jáne Qarashyǵanaq ken oryndaryndaǵy mańyzdy munaı-gaz jobalaryn iske asyrý jospary qarastyryldy, dep habarlaıdy Aqorda.

Memleket basshysyna elimizdiń munaı-gaz salasyn odan ári damytý jónindegi konsortsıým jumysynyń negizgi baǵyttary týraly aqparat berildi.

Atap aıtqanda, Qarashyǵanaqta qýaty 4 mıllıard tekshe metr bolatyn gaz óńdeý zaýytyn salý perspektıvalary talqylandy.

Qasym-Jomart Toqaev Eni S.p.A kompanııasy Qazaqstannyń energetıka salasyndaǵy strategııalyq seriktesteriniń biri ekenine toqtalyp, onyń elimizdiń iri ken oryndaryn ıgerýge úles qosqanyn atap ótti.

Memleket basshysynyń qatysýymen Qazaqstan Respýblıkasy, Mańǵystaý oblysy, Jańaózen qalasynda gıbrıdti elektr stantsııasyn salý jobasyna qatysty «QazMunaıGaz» ulttyq kompanııasy» aktsıonerlik qoǵamy men Eni S.p.A kompanııasy arasyndaǵy qaǵıdalar týraly kelisimge qol qoıyldy.