Aqmolalyqtarǵa Jańa jyldy otbasy aıasynda toılaýǵa keńes berildi

KÓKShETAÝ. QazAqparat – Aqmola oblysynyń bas memlekettik sanıtar dáriger Aınagúl Mýsına óńir turǵyndaryn Jańa jyldyq merekeni úıde otbasylyq sheńberde ótkizýge shaqyrdy, dep habarlaıdy QazAqparat tilshisi.

Óńirdiń bas memlekettik sanıtarlyq dárigeriniń aıtýynsha, mereke kúnderi koronavırýs ınfektsııasynyń taralýyna jol berilmeýi kerek.

Immýndaý men aldyn alýdyń arqasynda Aqmola oblysynda 2020 jyldyń sáıkes kezeńimen salystyrǵanda jiti vırýstyq gepatıttermen syrqattanýdyń 13 ese, kene entsefalıtimen 2,5 ese, salmonellez – 1,3 ese, ehınokokkoz – 1,3 ese, qyshyma – 1,5 ese tómendegeni baıqalady.

Sonymen qatar, bakterııalyq dızenterııamen syrqattaný - eki ese, jiti ishek ınfektsııalarymen syrqattanýdyń 1,1 ese óskeni baıqalady.

«Mereke kúnderi turǵyndar arasynda tamaqtan ýlaný sany artty. Osy kúnderi óz densaýlyǵymyzǵa jaýapkershilikpen qaraý kerek ekenin eske salǵym keledi. Taǵam daıyndaý tehnologııasyn buzbaý, kóp mólsherde taǵam daıyndamaý, jaramdylyq merzimi ótip ketken shyǵý tegi belgisiz azyq-túlik ónimderin satyp almaý jáne onyń durys saqtalýyn qamtamasyz etý, artyq tamaqtanbaý jáne taǵam daıyndaý protsesinde jeke gıgıena erejelerin saqtaý qajet», - dep atap ótti A.Mýsına.

Aqmola oblysy «jasyl» aımaqta ornalasqanyna qaramastan, A.Mýsına óńir turǵyndaryn jeke qaýipsizdik sharalaryn saqtaýǵa jáne jańa jyldy otbasylyq ortada ótkizýge shaqyrdy.

«Mereke kúnderi koronavırýs ınfektsııasyn juqtyrýǵa jol bermeý jáne karantındik talaptardy qataıtý úshin búginde barlyq sharalardy qabyldaý qajet. Biz óz densaýlyǵymyz ben aınalamyzdaǵy adamdardyń densaýlyǵy úshin jaýapkershilikti arttyra otyryp, merekeden keıin epıdemıologııalyq jaǵdaıdyń nasharlaýyna jol bermeımiz! Jańa jyl – otbasylyq mereke, ony otbasylyq sheńberde ótkizýdi suraımyn. Mereke kúnderi ınfektsııanyń taralýyna jol berilmeý kerek», - dep túıindedi A.Mýsına.