Aqmolalyqtardyń MÁMS qoryna aýdarǵan jarnasy 3,3 mlrd teńgege tolyqty
Vedomstvonyń deregi boıynsha, 2017 jyldyń 1 shildesinen 2018 jyldyń 31 qarashasyna deıin jumys berýshiler men jeke kásipkerlerdiń MÁMS shotyna aýdarylǵan jarnalarynyń jalpy somasy 4,5 mıllıard teńgeni qurady. Onyń 4,16 mıllıard teńgesi jumys berýshilerdiń aýdarylymy, 336 mıllıon teńgesi jeke kásipkerler men azamattyq-quqyqtyq jaǵdaıdaǵy kelisim-shart boıynsha jumys isteıtin tulǵalardyń jarnasy. Sondaı-aq, jumys berýshiler men jeke kásipkerler tólemdi ýaqytynda aýdarmaǵany úshin ósim tóledi. 2018 jyly Aqmola oblysynda jarnany tóleý barysyndaǵy ósimniń jalpy somasy 13,9 mıllıon teńgeni qurady.
«MÁMS jónindegi zańǵa sáıkes, tólemniń ýaqytynda aýdarylmaǵan somasy memlekettik kirister organdarymen izdestirilip, tólenbegen ár kún úshin Qazaqstan Respýblıkasy Ulttyq banki belgilegen qaıta qarjylandyrýdyń 1,25 ese resmı mólsherlemesi kóleminde eseptelgen ósimmen tóleýshiler qor shotyna aqsha aýdarady»,-deıdi «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Aqmola oblystyq fılıalynyń dırektory Nurlan Aqylbekov.
Sonymen qatar, 2018 jyldyń shildesinde engizilgen «Medıtsınalyq qyzmettiń tutynýshysy retinde MÁMS júıesine qatysý jóninde anyqtama berý» jáne «MÁMS-ǵa aýdarylǵan jarnalar jóninde aqparat berý» tárizdi jańa memlekettik qyzmettiń arqasynda ár azamat óz jarnasy men aýdarylymy tarıhynyń kóshirmesin jáne MÁMS júıesine qatysý mártebesi jóninde anyqtama ala alady. Bul memlekettik qyzmetti turǵyndarǵa qyzmet kórsetý ortalyǵy, MÁMS qory men onyń óńirlerdegi fılıaly usynady.
MÁMS-ke túsken barlyq qarjy Ulttyq bankte saqtalýda. Olarmen senimdi basqarý kelisim-sharty jasalǵan. Keıin qarjy MÁMS aıasynda kórsetiletin qyzmet tólemderine jiberiledi.