Aqmolalyqtardy ońaltý sharalary qalaı júzege asyrylyp otyr
Ortalyqtyń bas dárigeri Baqtııar Qonqabaevtyń aıtýynsha, medıtsınalyq mekemeni «Viamedis» jaýapkershiligi shekteýli seriktestigi memlekettik-jekeshelik áriptestik sheńberinde salǵan.
«Kókshetaýdaǵy «Viamedis» jaýapkershiligi shekteýli seriktestiginiń Klınıkalyq-ońaltý ortalyǵy 15 shildede saltanatty túrde ashyldy. Búgingi tańda ortalyqta naýqastardy qabyldaý jáne úshinshi kezeńdegi joǵary mamandandyrylǵan ońaltý terapııasy tárizdi qyzmetter kórsetilip jatyr. Ońaltýdyń úshinshi kezeńi degenimiz ne? Bul kúndizgi statsıonarda ońaltý, onda naýqastar kúni boıy terapııa alyp, barlyq emdik sharalar qabyldaǵan soń úılerine jiberiledi», - dedi Baqtııar Qonqabaev.
Ortalyq ashylǵan sátten bastap Kókshetaý qalasynyń ǵana emes, Aqmola oblysynyń búkil turǵynyna kómek kórsetilip keledi. Saryarqa shaǵynaýdany men jaqyn mańdaǵy shaǵynaýdandardyń turǵyndaryna yńǵaıly bolý úshin ortalyqta jalpy tájirıbe dárigerleriniń qabyldaýy da qarastyrylǵan. Emhanaǵa 20 myńnan astam kókshetaýlyq tirkelgen.
Kókshetaý qalasynyń turǵyny, zeınetker Ǵaısha Elimanova, 45 jyl boıy medıtsına salasynda eńbek etken. Ol ózge medıtsına uıymdarynda sııaqty uzyn-sonar kezektiń jańa ortalyqta bolmaýyna qaırań qalyp otyr.
«Ortalyq qyzmetkerleriniń barlyǵy, ásirese meıirbıkeler naýqastarmen óte sypaıy sóılesedi. Dárigerleri de keremet, naǵyz aq halatty abzal jandar. Qaı ýaqytta kel dese, sol ýaqytta baryp, tıisti protsedýralarymdy alamyn», - dep bólisti qala turǵyny.
Ǵımarattyń birinshi qabatynda kútý aımaǵy men tirkeýdi qamtıtyn shaǵyn keńseler ornalasqan. Dárigerge deıingi qabyldaý bólmelerinde medıtsınalyq qujattama resimdeledi, termometrııa júrgiziledi, sodan keıin naýqastar óziniń emdeýshi dárigerine barady. Azamattarǵa yńǵaıly bolý úshin elektrondy kezek bar. Naýqastyń nómiri men tegi ekranda kórsetilgennen keıin ol belgilengen keńsege barady.
Klınıka neırohırýrgııa, travmatologııa, ortopedııal, hırýrgııa baǵytyndaǵy em-domdy, ınsýlttan keıin ońaltý qyzmetin kórsetedi. Al balalarǵa negizgi nozologııalar – ortalyq júıke júıesi, aýtızm tárizdi dertterden ońaltý qyzmetterin usynady.
Ortalyq dárigerleriniń aıtýynsha, aldaǵy ýaqytta medıtsınalyq mekeme bazasynda dıagnostıka bólimshesin (KT, MRT, rentgen), endoskopııa ortalyǵy men terapııa beıinindegi tósek-oryndar ashý josparlanǵan.
«Biz qosymsha qarjylandyrýdy kútip otyrmyz, jaqyn arada táýlik boıy jumys isteıtin statsıonarlar iske qosylady dep oılaımyn. Bul ekinshi kezeńdegi ońaltý. Naýqastar bizde táýlik boıy orta eseppen 10-14 kún bolady jáne ambýlatorııalyq emdeýge usynymdar bere otyryp, ońaltý terapııasyn alady», - dedi ortalyqtyń bas dárigeri.