Aqmolalyqtar Jeńistiń 73 jyldyǵyn atap ótti
Ortalyq alańǵa jınalǵan myńdaǵan aqmolalyq «Urpaqqa uran bolǵan-Uly Jeńis!» atty teatrlandyrylǵan qoıylymdy tamashalady. Sonymen qatar, «Úzilgen arman», «Soǵystyń bastalýy», «Azap joly», «Desıatyı nash desantnyı batalon», «Prıval», «Drýjba» «Maıdannan hat», «Álııa-qazaqtyń batyr qyzy», «28 panfılovshy», «Vodrýjenıe znamenı na Reıhstag», «Pobeda» atty shaǵyn qoıylymdar, áskerı kıim kıgen jastardyń bıi men áni merekeniń mánin odan saıyn asha tústi.
Budan keıin oblys ákimi Málik Myrzalın, oblystyq máslıhat depýtattary, oblys ákiminiń orynbasarlary, soǵys jáne eńbek ardagerleri, oblystyq jáne qalalyq kásiporyn, uıym, mekemelerdiń basshylary úrlemeli aspaptar orkestriniń súıemeldeýimen Dańq alleıasy boıymen júrip ótip, «Máńgilik alaý» eskertkishine gúl destelerin qoıdy.
Saltanatty mıtıngte aımaq basshysy quttyqtaý sóz alyp, elimizdi zulym jaýdan qorǵap qalǵan ardagerlerdiń atyna izgi tilegin joldady.
«1945 jylǵy Jeńis - sana-sezimimizde nyq oryn alǵan, óz Otanyna degen shynaıy berilgendiktiń, qaıtpas qaharmandylyqtyń jáne máńgilik erliktiń jarqyn belgisi. Kóp ultty Qazaqstan halqy birliginiń, óz Otanyna jáne óz tarıhyna degen qurmetiniń nyshany. Qazaqstan Respýblıkasynyń Prezıdenti Nursultan Nazarbaev atap kórsetkendeı, halyq birliginiń nátıjesinde ǵana jeńiske jettik. Óskeleń urpaqqa ójettilik pen yntymaqtastyqtyń úlgisin kórsetken Uly Otan soǵysynyń ardagerlerine shynaıy súıispenshiligimizdi jáne tereń alǵysymyzdy bildiremiz. Ardagerlerdiń soǵys jyldaryndaǵy erligi men eren eńbegi bizdi beıbit maqsattarǵa, elimizdiń egemendigi men bostandyǵyn saqtaýǵa, onyń qýatyn nyǵaıtýǵa jeteleıdi», - dedi Málik Myrzalın.
Mıtıngte soǵysta sheıit bolǵan jandardy bir mınýttik únsizdikpen eske alyp, Kókshetaý tehnıkalyq ınstıtýtynyń kýrsanttary urys dalasynan oralmaǵan jaýyngerler rýhyna arnap aspanǵa qarýdan oq atty. Osy kúni aqmolalyq batyrlar Málik Ǵabdýllın men Talǵat Bıgeldınovtiń eskertkishine de gúl shoqtary qoıyldy.