Aqmolalyqtar saıası qýǵyn-súrgin jáne asharshylyq qurbandaryn eske aldy

KÓKShETAÝ. QazAqparat - Aqmola oblysynda 31 mamyr – saıası qýǵyn-súrgin jáne asharshylyq qurbandaryn eske alý kúnine oraı «XX ǵasyr qasireti – kúshtep ujymdastyrý, asharshylyq, qýǵyn-súrgin, deportatsııa» atty ǵylymı-təjirıbelik konferentsııa ótti, dep habarlaıdy QazAqparat tilshisi.

Shortandy aýdanynda ótken sharaǵa L.N.Gýmılev atyndaǵy Eýrazııa ulttyq ýnıversıtetiniń tarıh ǵalymdary, ádebıetshi ǵalymdar, tarıhshylar, depýtattar, jergilikti zııaly qaýym ókilderi men jastar qatysty.

Konferentsııada Shortandy aýdanynyń ákimi Saǵyndyq Shabarov, Eýrazııa ulttyq ýnıversıtetiniń professory, tarıh ǵylymdarynyń doktory Maqsat Alpysbesuly, Astana IT University kafedra meńgerýshisi, tarıh ǵylymdarynyń doktory Nurbek Shaıahmetov, Astana halyqaralyq ýnıversıtetiniń professory, tarıh ǵylymdarynyń kandıdaty Qanat Óskembaev, «Bilim órkenıet» ulttyq ınovatsııalyq ǵylymı zertteý ortalyǵy qoǵamdyq uıymynyń basshysy, tarıh magıstri Áziret Satylǵanov, Eýrazııa ýnıversıtetiniń Qazaqstan tarıhy kafedrasynyń oqytýshysy, tarıh magıstri Saıat Nábıev, «Memleket tarıhy ınsıtýty» qyzmetkeri Ǵızzat Tabyldın, Eýrazııa ulttyq ýnıversıtetiniń professory, tarıh ǵylymdarynyń kandıdaty Samat Esqalıevtiń asharshylyq, qýǵyn-súrgin jáne deportatsııa jyldarynyń aýyr kezeńi, stalınızmniń ozbyrlyǵy, qazaq ultynyń aýyr taǵdyry jáne onyń tragedııasy týraly baıandamalary tyńdaldy.

Tarıhshylar negizinen arhıvtik qujattarǵa súıene otyryp, saıası qýǵyn-súrgin jáne asharshylyq zardaptary jaıynda keleli áńgime órbitip, bul zulmattan sabaq alý kerektigin alǵa tartty.

«Oblys ákiminiń qoldaýymen óńirde saıası qýǵyn-súrgin qurbandaryn este saqtaý sharalary dáıekti uıymdastyrylyp keledi. Qazirgi ýaqytta ákimniń qoldaýymen saıası qýǵyn-súrgin qurbandaryn aqtaý jumystary júrgizilip jatyr. Qanshama tarıhtyń aqtańdaq betteri ashylyp jatyr»,- dedi Jabal Erǵalıev.

Shara sońynda jınalǵandar «ALJIR» memorıaldy-murajaı keshenine baryp, saıası qýǵyn-súrgin jáne asharshylyq qurbandaryna arnap Quran oqydy.

Aıta ketsek, saıası qýǵyn-súrgin jyldary Qazaqstanǵa Keńes odaǵynyń túkpir-túkpirinen 5 mıllıonnan astam adam jer aýdaryldy.

1930-1940 jyldary halyqtardy Qazaqstanǵa jappaı jer aýdarý júrgizildi.

Resmı málimetke sáıkes, 1921-1954 jyldar aralyǵynda Qazaqstanda 100 myń adam jazyqsyz ustalyp, onyń 25 myńyna eń joǵary jaza – atý sharasy qoldanyldy.

Eske sala keteıik, budan buryn «Kókshetaýda Maǵjan Jumabaevtyń Alash rýhanııatyndaǵy róli» taqyrybynda konferentsııa ótkenin jazǵan edik.