Aqmolalyqtar Naýryz meıramyn erekshe toılaýda
Arqanyń aq tańymen ilesken aqmolalyqtar oblys ortalyǵyndaǵy Táýelsizdik jáne Abylaı han alańdaryna jınalyp, merekeni «Ulystyń uly kúni – Naýryz meıramy» atty teatrlandyrylǵan qoıylymmen qarsy aldy. Segiz bólimnen turatyn qoıylymnyń alǵashqy «Súıinshi» bóliminde 150 adamnan quralǵan bı ujymdary «Naýryz bastaý» teatrlandyrylǵan kompozıtsııasyn usynsa, «Qudyretti Jer Ana» bóliminde ortalyq alańǵa Umaı anamen arnaıy bezendirilgen avtokólik júrip ótti. «Qydyr baba» bóliminde túıege otyrǵan Qydyr Ata alań boıymen júrip ótip, aq batasyn berdi.
Merekelik shara «Kókshetaý-sal-seriler mekeni», «Aq dastarhan», «Baqytty balalyq shaq» tárizdi shaǵyn qoıylymdarmen jalǵasyn taýyp, merekeniń kórkin odan saıyn qyzdyrdy. Ásirese, oblystyq fılarmonııanyń ánshileri men oblystyń ár shalǵaıynan kelgen kórkemónerpazdar ujymdary merekeni ásem ánmen árlendirip, kúmis kúımen, myń buralǵan bımen túrlendirip, kópshilik kóńilin shalqyta tústi.
Bul kúni alańǵa 10-ǵa jýyq kıiz úı tigilip, merekeni tamashalaýǵa 5 myńǵa jýyq adam jınaldy. Dástúr boıynsha otandyq dekoratıvti-qoldanbaly óner sheberleriniń, sýretshilerdiń kórmeleri men jergilikti óndirýshiler ónimderiniń jármeńkesi uıymdastyryldy. Sondaı-aq, jastar úshin altybaqan qurylyp, balalarǵa arnalǵan oıyn alańy jumys istedi.
Saltanatty sharaǵa qatysqan óńir basshysy Ermek Marjyqpaev quttyqtaý sóz sóılep, jınalǵan halyqqa júrekjardy tilegin arnady.
«Naýryz meıramy-adam men tabıǵat qarym-qatynasyndaǵy jańarýdyń, berekeniń jáne úılesimdiliktiń sımvoly. Naýryz meıramyn qarsy ala otyryp, biz jasaǵan isimizdi qorytyndylaımyz jáne bolashaqqa jospar quramyz. Bıylǵy jyly Naýryz meıramyn jańa saıası reformalardyń bastalýymen atap ótýimizdiń ózindik sımvoldyq máni bar. Jańa Qazaqstandy qurý jolyndaǵy reformalarǵa súıene otyryp, biz elimizdiń áleýmettik-ekonomıkalyq damýyndaǵy kórsetkishterdi jaqsartyp, azamattarymyzdyń ál – aýqatyn arttyra alamyz dep senemin», - dep atap ótti aımaq basshysy.
Merekelik shara barysynda memlekettiń áleýmettik-ekonomıkalyq jáne mádenı damýyna qosqan eleýli úlesi, belsendi qoǵamdyq qyzmeti, sondaı-aq azamattardy qorǵaý men qutqarýdaǵy jeke janqııarlyǵy úshin «Parasat», «Qurmet» ordenderiniń, «Shapaǵat» medaliniń jańa ıegerleri marapattaldy.
Al, sport súıer qaýym úshin Abylaı han alańynda qazaq kúresi, arqan tartý, gir kóterý sııaqty ulttyq sport túrlerinen jarystar uıymdastyryldy. Shara odan ári merekelik kontsertke ulasty.
Aıta keteıik, jalpy Aqmola oblysynda Naýryz merekesine oraı, 1000-nan astam túrli is-shara ótýde.