Aqmolalyqtar Naýryz kóje pisirýden saıysqa tústi
Aqmola oblysy mádenıet basqarmasy jáne Atameken Ulttyq kásipkerler Palatasy janyndaǵy oblystyq isker áıelder keńesiniń uıymdastyrýymen ótken baıqaýǵa «GorMolZavod» JShS, «Evrazııa Grýpp Qazaqstan» JShS, «KókshetaýEnergo» JShS, «Aqsaı nan Kókshetaý» JShS, «Evrazııskıı Bank» AQ fılıaly, «Kókshetaý mıneraldy sýlary» AQ, «Asyl Arman» JShS, «Bıjan» JShS, «Aqmola oblysy polıaktar qaýymdastyǵy» qoǵamdyq uıymy, «Shýataeva Tólesh Ramazanqyzy» jeke kásipkerligi sııaqty 10 kásiporyn ókilderi qatysty.
Baıqaý jeńimpazdary usyný/bezendirýi (taǵamnyń jalpy kórinisi, organoleptıkalyq qasıetteri, tábeti) taǵamnyń syrtqy túri, tanystyrylym (folklorlyq/teatrlandyrylǵan), kásibı sheberligi, taǵam daıyndaý qıyndyqtary, ereksheligi (ataýy, ańyzdyń bolýy, tarıhı anyqtama), taǵamnyń dámi tárizdi krıterııleri boıynsha anyqtaldy.
«Naýryz qazaq halqy úshin ejelden-aq bereke-birliktiń, el-jurt, aǵaıyn-týys arasyndaǵy tatýlyqtyń, eren eńbektiń, jańarǵan tirshiliktiń uly sımvoly. Ulystyń uly kúni – Naýryz meıramyn dástúrli naýryz kójesiz elestetý múmkin emes. Yrymshyl qazaq halqy áý bastan kıelilikke, qasıetti sandarǵa mán bergen. Sol sebepti bul taǵamdy jeti túrli taǵamnan jasap, molshylyq bolsyn, bereke bolsyn dep nıet etken», - dep atap ótti Aqmola oblysy mádenıet basqarmasynyń basshysy Aıgúl Sábıtova.
Baıqaý qorytyndysy boıynsha 1 júldeli oryndy «KókshetaýEnergo» JShS jeńip alsa, ekinshi jáne úshinshi oryndardy «Aqmola oblysy polıaktar qaýymdastyǵy» qoǵamdyq uıymy men «Evrazııa Grýpp Qazaqstan» JShS ózara bólisti. Sonymen qatar, «Kórermen kózaıymy» atalymyna «Evrazııskıı Bank» AQ fılıaly laıyq dep tanyldy. Al, oblystyq isker áıelder keńesiniń arnaıy syılyǵy «Kókshetaý mıneraldy sýlary» AQ-na buıyrdy.
Baıqaýdyń barlyq qatysýshylary dıplom, alǵys hat jáne baǵaly syılyqpen marapattaldy.
Baıqaýǵa kelýshiler úshin «Kókshetaý» mádenıet saraıynda altybaqan ornatylyp, dekoratıvti qoldanbaly óner sheberleriniń kórmesi uıymdastyryldy. Onda quraq kórpe sheberi Uljalǵas Qarymsaqova, shı toqýshy Kenjebaı Smaǵul, kıiz basýshy Ulbolsyn Asqarovanyń qoldan jasaǵan buıymdary usynyldy.