Aqmolalyqtar 1 mamyr merekesin keńinen atap ótti
Kókshetaý qalasynda Qopa kóliniń jaǵajaı aýmaǵynda uıymdastyrylǵan merekelik sharaǵa jınalǵan halyqtyń qarasy kóp boldy. Shara aıasynda oblystyń ár óńirinen jınalǵan shyǵarmashylyq ujymdardyń qatysýymen «Bir shańyraq astynda» jáne Qazaqstan halqy Aqmola Assambleıasy etnomádenı birlestikteriniń qatysýymen «Dostyq dámi» oblystyq festıvalderi ótti. Áýelegen ásem án men myń buralǵan bıshilerdiń kontserttik baǵdarlamasy, túrli ulttyq sport oıyndary merekeniń shyraıyn odan saıyn asha tústi.
Sonymen birge, qaz-qatar tigilgen 17 shatyrda qala turǵyndary men qonaqtary úshin Qazaqstan halqynyń ulttyq salt-dástúrleri, ádet-ǵuryptary men taǵamdarynyń, taǵy 3 shatyrda taqyryptyq mazmundaǵy sándik-qoldanbaly óner týyndylarynyń kórmeleri usynyldy.
Jınalǵandar aldynda Aqmola oblysy mádenıet basqarmasynyń basshysy Aıgúl Sábıtova sóz sóılep, qala turǵyndary men qonaqtaryn merekemen quttyqtady.
«Qazaqstan halqynyń birligi kúnin oblystyń ár óńirinen jınalǵan shyǵarmashylyq ujymdardyń «Bir shańyraq astynda» jáne Qazaqstan halqy Aqmola Assambleıasy etnomádenı birlestikteriniń «Dostyq dámi» oblystyq festıvalderimen keń kólemde atap ótip otyrmyz. Búgin merekelik sharamyzǵa Aqmola jáne Soltústik Qazaqstan oblystarynyń, sondaı-aq Astana qalasynyń eń daryndy ujymdary qatysýda. Mereke barshańyzǵa qut bereke ákelsin!», - dedi Aıgúl Sábıtova.
Sonymen birge, «Kókshetaý» mádenıet saraıynyń uıymdastyrýymen Qazaqstan halqynyń birligi kúnine jáne Temirbek Júrgenovtiń 125 jyldyǵyna arnalǵan «Bı - rýh tynysy» atty horeografııalyq festıvaliniń gala-kontserti ótti. Gala-kontsertke Soltústik Qazaqstan oblysy, Ereımentaý, Qorǵaljyn, Arshaly, Atbasar, Sandyqtaý aýdandarynyń, sondaı- aq, Astana, Stepnogor jáne Kókshetaý qalalarynyń bı ujymdary qatysyp, óz ónerlerin pash etti. Festıval sońynda qatysýshylar dıplomdarmen jáne 100 myń teńge aqshalaı sertıfıkattarmen marapattaldy.
Merekelik shara keshke oblystyq jastar resýrstyq ortalyǵy uıymdastyrǵan jastarǵa arnalǵan oıyn-saýyq baǵdarlamasyna jalǵasady.
Aıta ketsek, Aqmola oblysynda júzden astam ult men ulystyń ókilderi ómir súrip jatyr. Oblysta óz halqynyń mádenıetin, tilin, ádet-ǵuryptary men salt-dástúrlerin nasıhattap, damytýmen aınalysatyn qyryqqa jýyq etnomádenı birlestik tirkelgen, onyń ishinde 20 birlestik Kókshetaý ornalasqan. Olardyń shyǵarmashylyq qyzmetin uıymdastyrýda Kókshetaý jáne Stepnogor qalalarynda Dostyq úıleri, Zerendi aýdanynda Dostyq ortralyǵy qyzmet etedi.
Aıta ketsek, budan buryn kókshetaýlyq qazaq tili jáne ádebıet pániniń muǵalimi Alena Malkova-Solopovanyń qazaq tilinen sabaq berip júrgenin jazǵan edik.