Aqmolalyq volonterler soǵys ardagerleriniń úıine baryp kómektesip júr

KÓKShETAÝ. QazAqparat - Qazaqstan halqy Aqmola assambleıasynyń volonterleri jergilikti soǵys ardagerlerine dári-dármek, azyq-túlik jáne antıseptıkter satyp áperýde, dep habarlaıdy QazAqparat tilshisi.

«Biz jalǵyz basty, bireýdiń kómegine muqtaj ardagerlerdiń tizimin alyp, qajettilikterin surap bildik. Búginnen bastap volonterlerimiz dári-dármekpen kómektese bastady. Aýdandarda ardagerlerdiń tizimi anyqtalýda. Olardyń barlyǵyna dári-dármek, azyq-túlik, antıseptık jáne maska jetkizetin bolamyz», - deıdi Qazaqstan halqy Aqmola assambleıasynyń janyndaǵy eriktiler ortalyǵynyń basshysy Ýmar Shonazarov.

Onyń aıtýynsha, volonterler osyǵan deıin de birneshe ret kómek kórsetken kókshetaýlyq eki ardagerdiń biri - 97 jastaǵy Vasılıı Gorbonos. Ol Belarýs maıdanynda jaýmen betpe bet soǵysqan. Úsh ret jaraqat alǵan. Búgingi tańda ardagerdiń densaýlyǵy syr berip, dári-dármektiń kúshimen ǵana qozǵalady.

Sondaı taǵy bir soǵys ardageri - Nıkolaı Derıglazov. Qyzymen turatyn onyń páterine jóndeý jumystary qajet.

Dári-dármek, azyq-túlik jáne antıseptıkter jetkizip bergen volonterler ardagerlerdiń úılerin tazalap, kúrdeli jóndeý jumystaryn júrgizýge kómektesetin boldy.

Volonterler ardagerlerden bólek, múmkindigi shekteýli jandardy, kópbalaly jáne áleýmettik jaǵynan az qamtylǵan otbasylardy da qamqorlyǵyna almaq.