Aqmolalyq turǵyn óziniń jer ýchaskesin eki ret satqan

KÓKShETAÝ. QazAqparat - Aqmola oblysynyń turǵyny óziniń jer ýchaskesin eki ret satqan, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.

Vedomstvo málimetinshe, Tselınograd aýdandyq polıtsııa bólimine Astana qalasynyń turǵynynan alaıaqtyqqa qatysty aryz túsken. Zalal somasy 3,5 mıllıon teńgeni qurady.

Aryz berýshiniń aıtýynsha, jergilikti turǵyn oǵan basqa bireýdiń jer ýchaskesin satqan. Er adam bul týraly alaıaqqa qolma-qol aqsha berip, qurylys materıaldaryn jetkizbek bolǵan kezde ǵana bilgen.

«Jedel-izdestirý is-sharalary barysynda polıtsııa qyzmetkerleri kúdiktini anyqtady jáne oǵan qatysty tergeý amaldaryn qolǵa aldy. Belgili bolǵandaı, kúdikti jer ýchaskesin buǵan deıin oblystyń ózge turǵynyna satqan. Alaıda ol jerge menshik quqyǵyn tirkep úlgermegen. Er adam bul jaǵdaıdy paıdalanýǵa tyrysyp, jerdi basqa adamǵa satyp jibergen. Osy derekke baılanysty Qylmystyq kodekstiń 190-baby 3-bóligi («Alaıaqtyq») boıynsha sotqa deıingi tergeý amaldary qolǵa alyndy», - dedi vedomstvodan.

Osy rette, tártip saqshylary jer telimin satyp alý týraly sheshim qabyldamas buryn, onyń tarıhyn bilip, ýchaskemen barlyq zańdy áreketter týraly anyqtamany surap, zańgerlerdiń kómegine júginýdi usynady.