Aqmolalyq samboshy Azııa chempıony atandy

KÓKShETAÝ. QazAqparat – Aqmolalyq samboshy Valerııa Aksenova Azııa chempıony atandy, dep habarlaıdy QazAqparat tilshisi oblystyq dene shynyqtyrý jáne sport basqarmasy baspasóz qyzmetine silteme jasap.

Vedomstvonyń málimetinshe, Úndistannyń Nıý-Delı qalasynda Azııanyń 20 elinen jınalǵan 350 astam sportshynyń qatysýymen sambodan qurlyq chempıonaty ótken.

«Klassıkalyq jáne áskerı ádister boıynsha ótken jarysta aqmolalyq Valerııa Aksenova 75 keliden joǵary salmaqta Azııa chempıony atandy. Jerlesimiz Nurtas Shatkenov pen Evgenıı Sýdeıkınniń jetekshiligimen jattyǵyp júr», - deıdi vedomstvonyń baspasóz hatshysy Mahabbat Bolshına.

Jalpy, jarys qorytyndysy boıynsha eń kóp upaı jınaǵan Ózbekstan quramasy - 22 altyn, 11 kúmis jáne 6 qola medalmen komandalyq esepte birinshi oryn alǵan. Odan keıin 20 altyn, 16 kúmis jáne 10 qola medal ıelengen Qazaqstan quramasy - ekinshi, 5 altyn, 1 kúmis jáne 2 qola enshilegen Mońǵolııa quramasy - úshinshi orynǵa turaqtady.