Aqmolalyq polıtseıler terraktiden qaza bolǵandardy bir mınýt únsizdikpen eske aldy
Aqmola oblystyq Polıtsııa departamentiniń qyzmetkerleri elimizde lańkestermen qaqtyǵysta qaza tapqan quqyq qorǵaý organdarynyń qyzmetkerleri men áskerı qyzmetshilerdi bir mınýt únsizdikpen eske aldy, dep habarlaıdy QazAqparat tilshisi vedomstvonyń baspasóz qyzmetine silteme jasap.
«Beıbit azamattardyń qaýipsizdigin qamtamasyz etý jáne terrorısterdiń shabýylyna toıtarys berý kezinde 8 polıtsııa qyzmetkeri men Ulttyq gvardııanyń áskerı qyzmetshileri qarýly qylmyskerlerdiń qolynan qaza tapty. Erlik pen batyrlyqty kórsete otyryp, olar ózderiniń qyzmettik jáne áskerı boryshyn sońyna deıin oryndady. Olar týraly estelik áriptesteriniń jáne búkil Qazaqstan halqynyń júreginde máńgi saqtalady», - dep atap ótti Aqmola oblysynyń komendanty Armanbek Baımýrzın.