Aqmolalyq polıtseıler kópbalaly otbasyn órtten aman alyp qaldy

KÓKShETAÝ. QazAqparat – Aqmola oblysynda polıtsııa qyzmetkerleri kópbalaly otbasyn órtten qutqardy, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, órt bıylǵy jyldyń 5 qańtarynda saǵat 11:00 shamasynda Zerendi aýdanynyń Vıktorovka aýylynda oryn alǵan.

«Órt bolǵan úıde kóp balaly otbasy turdy. Otaǵasy astanada jumys isteıdi. Úıde 34 jastaǵy Irına men onyń bes balasy qaldy. Órt shyqqan kezde áıel balalarymen birge dalaǵa júgirip shyqty», - dedi vedomstvodan.

Sol ýaqytta ákimshilik aýmaqty aralap júrgen Zerendi aýdandyq PB ýchaskelik ınspektorlary, polıtsııa kapıtany Ardaq Nurmuqanov pen maıor Rızabek Qýanyshbaev dalada turǵan áıeldi balalarymen birge qyzmettik kólikke otyrǵyzdy. Al ózderi otqa oranǵan úıden gaz ballonyn syrtqa shyǵaryp, órtti sóndirýge tyrysty.

Osylaısha, tártip saqshylarynyń qyraǵylyǵynyń arqasynda úı tolyq janyp ketýden aman qaldy.