Aqmolalyq oqýshylar Táýelsizdiktiń 30 jylyndaǵy jetistiktermen tanysty

KÓKShETAÝ. QazAqparat - Kókshetaý qalasynyń fızıka-matematıka baǵytyndaǵy Nazarbaev zııatkerlik mektebinde «Árptes mektepter» jobasy aıasynda el Táýelsizdiginiń mereıtoıyna arnalǵan «Jasampazdyq pen damý jyldary» taqyrybynda ashyq sabaq ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Sharaǵa onlaın-rejımde oblystyń 95 jetekshi mektebinen 2 500-ge jýyq oqýshy qatysty.

Oqý ornynyń akt zalynda sabaq bastalar aldynda fotokórme uıymdastyryldy, onda oqýshylardyń nazaryna zııatkerlik mektepterdiń oqýshylary men muǵalimderiniń Qazaqstannyń Tuńǵysh Prezıdenti – Elbasy Nursultan Nazarbaevpen kezdesýleri jáne Qazaqstannyń táýelsizdik alǵannan bergi búkil júrip ótken joly beınelengen fotosýretter usynyldy.

Ashyq sabaq barysynda pedagogtar men oqýshylar Táýelsizdik kezeńindegi Respýblıkanyń damý kezeńderin, jetistikterin, eldiń bitimgerlik bastamalaryn, sonyń ishinde ıadrolyq qarýsyzdaný jáne onyń taralýyn toqtatý salasyndaǵy bastamalaryn, Qazaqstannyń Tuńǵysh Prezıdenti Nursultan Nazarbaevtyń memleket qurýdaǵy negizgi rólin talqylady.

«Balalar táýelsizdiktiń jarııalanýy men álemniń halyqaralyq kartasynda egemendi Qazaqstannyń paıda bolýynan jáne Konstıtýtsııany qabyldaýdan bastap memlekettik basqarý qurylymyn qurýǵa, memlekettik rámizderdi bekitýge deıingi barlyq joldy jaqsy bilýge tıis. Kóp jaǵdaıda tulǵanyń qalyptasýy osydan bastalady», - dep bólisti «Qazirgi álemdegi Qazaqstan» pániniń oqytýshysy Amangeldi Sátıev.

Sabaq sońynda oqýshylar demografııa, ekonomıka, ǵylym jáne ekologııa salasynda aldaǵy 30 jyl ishinde elimizdiń damýy týraly ózderiniń ǵylymı boljamdaryn usyndy.