Aqmolalyq oqýshylar «Maǵjan oqýlarynda» top jardy

KÓKShETAÝ. QazAqparat - Aqmola oblysynyń oqýshylary respýblıkalyq «Maǵjan oqýlary» baıqaýynda bas júlde jáne birinshi oryndy jeńip aldy.

Aqmola oblysy ishki saıasat basqarmasynyń habarlaýynsha, Petropavl qalasynda ótken «Maǵjan oqýlary» respýblıkalyq baıqaýy óz máresine jetti. Qazaqstannyń túkpir-túkpirinen jınalǵan balalar úsh atalym boıynsha baq synady. Baıqaý M.Jumabaevtyń týǵan aýyly Sarytomarda ótkizildi. Aqmola oblysynyń atynan Aqkól aýdanynyń oqýshylary synǵa tústi.

«Aqyn da bir bala ǵoı, aıǵa umtylǵan...» nomınatsııasy boıynsha Keńes orta mektebiniń 10-synyp oqýshysy Baǵdat Jarqynbek Gran-prıdi qanjyǵasyna baılap, SQO ákimi atynan noýtbýk, alǵys hat jáne qundy kitaptarmen marapattaldy.

«Tolqyndy tolqyn qýady...» nomınatsııasynda Mınsk orta mektebiniń 8-synyp oqýshysy Aqjol Máýlethan «Túrkistan óleńiniń kórkemdik ereksheligi» atty ǵylymı jobasyn qorǵap, beınekameraǵa ıe boldy.  Ǵylymı jobany daıyndaýǵa qosqan úlesi úshin Mınsk orta mektebiniń qazaq tili jáne ádebıeti pániniń muǵalimi Muratbek Qadyr alǵys hatpen marapattaldy.  

Kelesi nomınatsııa - «Óleń - meniń Sholpanym, Aıym, Kúnim» taqyryby boıynsha «Mánerlep oqý» boıynsha, Aqkól aýdany, Keńes orta mektebiniń 9-synyp oqýshysy Rana Myrzahmet SQO bilim basqarmasynyń alǵys hatymen marapattaldy.

Balalardyń jetekshisi bolǵan Aqkól aýdany bilim bóliminiń ádiskeri Hansha Aqtyshqanqyzy SQO bilim basqarmasynyń alǵys hatyna ıe boldy.