Aqmolalyq oqýshylar endi attestatpen birge kolledj dıplomyn alyp shyǵady

KÓKShETAÝ. QazAqparat - Aqmola oblysynda kolledjder bazasynda joǵary synyp oqýshylaryna jumys biliktiligin beretin pılottyq joba iske qosyldy. Bul týraly QR Oqý-aǵartý mınıstrliginiń tehnıkalyq jáne kásiptik bilim departamenti habarlady.

Jańa bilim baǵdarlamasy 10-11 synyp oqýshylaryna óz mektebinde bilim ala júrip, kolledjde jumysshy mamandyqtaryn qatar meńgerýge múmkindik beredi.

«Qazirgi ýaqytta 16 jumysshy biliktiligi anyqtaldy. Oqytý - kúnine 2 saǵattan. Búgingi tańda elimizdiń ár óńirinde 2 kolledj anyqtaldy. Onda oqýshylar kásibı daıyndyqtan ótedi», - deıdi Ernat Júnisov.

Pılottyq joba boıynsha Aqmola oblysynyń oqýshylary Kókshetaý qalasynyń Qurylys-tehnologııalyq kolledji men Stepnogorsk qalasynyń joǵarǵy kolledji bazasynda bilim alady.

«Bıyl pılottyq jobaǵa Kókshetaý qalasynyń eki mektebi qatysady. Oqýshylar aspaz, naýbaıshy, sándik-qoldanbaly óner jáne dánekerleýshi mamandyǵyn oqıdy. Stepnogor qalasynda 9 mektep baǵdarlamaǵa qatysýǵa nıet bildirdi. Bul mektepterdiń túlekteri «Interer dızaıny» jáne «avtomobıl kóligine tehnıkalyq qyzmet kórsetý, jóndeý jáne paıdalaný» mamandyqtary boıynsha bilim ala alady. Kolledjde bilim berý protsesin júrgizý úshin bilim berý baǵdarlamasy ázirlendi, pedagogter daıyn, arnaıy pánder sheberhanalary men kabınetteri jabdyqtalǵan», – deıdi Aqmola oblysy bilim basqarmasynyń basshysy Shoqan Orazalın.

Aıta keteıik, oqýdy aıaqtaǵannan keıin oqýshylar mektep attestatymen qatar kolledj dıplomyn alyp, eńbek naryǵyna shyǵa alady.