Aqmolalyq memqyzmetshi kópbalaly otbasylardyń balalaryna aǵylshyn tilin tegin úıretpekshi

KÓKShETAÝ. QazAqparat - Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkeri Aqerke Bekahmetova kópbalaly otbasylardaǵy balalarǵa aǵylshyn tilin tegin úıretpekshi, dep habarlaıdy QazAqparat tilshisi vedomstvonyń baspasóz qyzmetine silteme jasap.

Vedomstvonyń baspasóz hatshysy Jazıra Toqtarqyzynyń aıtýynsha, qazirgi kezde Aqerke memlekettik qyzmetshi, «Bolashaq» baǵdarlamasy boıynsha shetelden bilim alyp kelgen maman. Onyń mundaı ıgi ispen aınalysýyna elimizdegi kópbalaly otbasylarǵa kásipkerler men qoǵam belsendileriniń jasap jatqan qaıyrymdy isteri arqaý bolǵan.

«Sońǵy kezderi kóptegen adamdar qoldaýǵa muqtaj jandarǵa kómek qolyn sozýda. Bireýler páter satyp alyp berip jatsa, basqalary balalarǵa syılyqtar úlestirýde. Tipti, kópshiligi azyq-túlikpen nemese kıim-keshekpen kómektesýde. Árbireýi qolynda baryn berip, kómekterin aıap jatqan joq» - deıdi Aqerke Bekahmetova.

Bul jaǵdaı Aqerkeni de balalarǵa aǵylshyn tilin úıretip, bolashaqta olardyń mol tabysqa qol jetkizýine yqpal etý sııaqty meıirimdi bastamany iske asyrýǵa ıtermelep otyr.

«Men turmysy tómen jáne kópbalaly otbasylardan shyqqan, qymbat turatyn til kýrstarynan ótýge jaǵdaıy joq, biraq oqýǵa qumar balalardy aǵylshyn tiline úıretý boıynsha áleýmettik jobany júzege asyrǵym keledi» - deıdi Aqerke Bekahmetova.

Jas mamanǵa atalmysh jobany júzege asyrýda balalarǵa aǵylshyn tilinen sabaq ótkizetin orynnyń bolmaýy biraz qıyndyqtar týǵyzypty. Alaıda, bul másele «Nur Otan» partııasynyń Aqmola oblystyq fılıaly basshylyǵynyń arqasynda sheshildi. Partııa fılıaly tarapynan sabaq ótkizetin oryn bólindi.

Sabaqty Aqerke aptasyna bir ret demalys kúni ótkizýdi josparlaýda.

Búgingi tańda, onyń aıtýynsha, bar bolǵany topqa balalardy jınap, til úıretýdi bastaý ǵana qaldy. Osyǵan oraı resmı túrde ótinim qabyldaý jarııalandy. Kópbalaly jáne az qamtylǵan otbasylardan shyqqan, til úırengisi keletin balalar [e-mail] elektrondyq poshtasyna ótinish bere alady.

Eske sala keteıik, osyǵan deıin habarlaǵanymyzdaı «Bolashaq» baǵdarlamasynyń stıpendıaty, Aqmola oblysynyń Egindikól aýdanynyń ákimi Erlan Isabekov te aýdan turǵyndaryna aǵylshyn tilin úıretip keledi. Ákim jerlesterine aǵylshyn tilinen sabaq berip qana qoımady, turmystyq, áleýmettik máselelerin de sheshýge atsalysýda.