Aqmolalyq qutqarýshylar jolda qalǵan 8 reseılikke kómektesti

KÓKShETAÝ. QazAqparat - Aqmola oblysynda jolda qalǵan Reseıdiń 8 azamaty Esil aýdanyndaǵy jylytý pýnktine jetkizildi, dep habarlaıdy QazAqparat tilshisi Aqmola oblysynyń Tótenshe jaǵdaılar departamentiniń baspasóz qyzmetine silteme jasap.

Vedomstvonyń málimetinshe, naýryzdyń 20-da aqmolalyq qutqarýshylar Qostanaıdan Nur-Sultan qalasyna bet alǵan reseılik 8 azamatqa kómektesti. Olar kólikteriniń benzıni taýsylyp, toqtaýǵa májbúr bolǵan.

«Bir top reseılikter Esil qalasynyń mańyndaǵy tas jolda eki avtokólikpen turyp qaldy, olardyń kólikterinde benzın taýsylyp qaldy. Olardy qutarýshylar aýdan ortalyǵyndaǵy jylytý pýnktine evakýatsııalady. Sonda túnep shyqqan reseılikter tańerteń kólikterine janarmaı quıyp, saparlaryn odan ári jalǵastyrdy», - dedi vedomstvodan.

Aıta keteıik, naýryzdyń 20-21 kúnderi Aqmola oblysynyń Atbasar jáne Býrabaı aýdandarynda jylytý pýnktine 31 adam, onyń ishinde eki bala evakýatsııalandy.