Aqmolalyq kásipkerge dızeldi jeńildikpen berýden negizsiz bas tartylǵan

KÓKShETAÝ. QazAqparat – Aqmola oblysynda kásipkerge jeńildetilgen dızel otynyn berýden negizsiz bas tartylǵan. Ákimshilik kedergilerge tap bolǵan Bulandy aýdanyndaǵy sharýashylyq basshysy oblystyq Sybaılas jemqorlyqqa qarsy qyzmet departamentine júgindi, dep habarlaıdy QazAqparat tilshisi vedomstvonyń baspasóz qyzmetine silteme jasap.

Belgili bolǵandaı, bıyl astyq daqyldaryn ósirýmen aınalysatyn kásipkerge egis naýqanyn júrgizý úshin memlekettik qoldaý sheńberinde 15,8 tonna kepildendirilgen (jeńildikti) dızel otyny bólingen. Bul rette janar-jaǵarmaı agrarshylarǵa aı saıyn jetkiziledi.

Aqpannan naýryzǵa deıin fermer shetelde bolyp, sol sebepti dızel otynyn alý úshin arzandatylǵan janar-jaǵarmaı jetkizý jónindegi operatorǵa júgine almady. Alaıda, sáýir aıynda júgingen kezde, operator ótinimniń ýaqtyly berilmegendigine silteme jasaı otyryp, aýyl sharýashylyǵy taýaryn óndirýshige ótken kezeńge 6,6 tonna jeńildikti dızel otynyn berýden bas tartqan.

«Departament aýyl sharýashylyǵy basqarmasynyń, operatordyń jáne JShS-niń qatysýymen kezdesý ótkizip, eki aı ishinde janar-jaǵarmaı jetkizýden bas tartýdyń negizsiz ekenin anyqtady. Nátıjesinde kásipker dızel otynynyń qajetti kepildendirilgen kólemin jeńildetilgen baǵamen alyp, kóktemgi egis jumystaryna daıyndyqty jalǵastyra aldy», - dedi vedomstvodan.

Aıta ketsek, budan buryn Aqmola oblysynda jalǵan hattama toltyrǵan polıtsııa qyzmetkeri sottalǵanyn jazǵan edik.