Aqmolalyq kásipker aýyl turǵyndaryna hokkeı kortyn salyp berdi
Vedomstvonyń deregi boıynsha, «Rýhanı jańǵyrý» baǵdarlamasy sheńberinde óńirde birqatar metsenattar men janashyr azamattar ózderiniń týyp-ósken jerine qoldaý kórsetýde. Tek osy jyldyń ózinde ǵana tabysty bıznesmender jalpy quny 4,6 mıllıard teńge bolatyn 80-nen astam áleýmettik bastamany júzege asyrýda.
«Ár aýdanda aýyldyń gúldenýi men aýyl turǵyndarynyń jaǵdaıyn jaqsartýǵa kómek qolyn sozyp, qamqor bolatyn azamattar bar. Sandyqtaý aýdanyndaǵy «Svobodnoe» JShS dırektory Aleksandr Zakýsılovty sondaı jandardyń qataryna jatqyzýǵa bolady. Bıylǵy jyly irgeli sharýashylyq Maksımovka aýylynda jas mamandarǵa arnap 10 páterli úı salyp berdi. Oqýshylardy tasymaldaý úshin shaǵyn avtobýs satyp áperip, aýylishilik kóshelerge aǵymdaǵy jóndeý jumystaryn júrgizdi. Endi mine, hokkeı kortyn ashyp, aýyldastaryn qýantyp otyr», dep atap kórsetilgen vedomstvonyń baspasóz habarlamasynda.
Belgili bolǵandaı, sport nysanynyń qurylysyna metsenat 150 mıllıon teńgeden astam qarjy salǵan. Jabyq hokkeı kortynda 72 orynǵa arnalǵan medıtsınalyq bólme, jattyǵý zaly, jýý, tóreshi bólmesi men kórermender otyratyn oryn, sport, shaǵyn fýtbol, balalar, demalys jáne mádenı-kópshilik is-sharalardy ótkizýge arnalǵan alańdar bar.
«Bul muzda árdaıym kelýshiler kóp bolsyn. Bul jerde olımpıada sportshylarynyń jańa býyny ósetinine tilektestigimdi bildiremin», - deıdi Aleksandr Zakýsılov.
Hokkeı kortynda ashylý qurmetine alǵashqy jarystar men muz shoýy ótti.
Aıta keterlik jaıt, sandyqtaýlyqtar ózderiniń kórnekti sportshy-jerlesterin maqtan tutady, olardyń arasynda olımpıada oıyndarynyń kúmis júldegeri, qazir Qazaqstannyń eńbek sińirgen jattyqtyrýshysy, shańǵyshy Vladımır Sahnov bar.
Búgingi kúni Sandyqtaý aýdanynda 100-den astam sport nysany jumys isteıdi. Ótken jyly aımaq basshysy Málik Myrzalın «Bolashaq» dene shynyqtyrý-saýyqtyrý keshenin ashqan edi. Budan bólek aýdannyń mereıtoıyna oraı Veseloe aýylynda fýtbol alańy paıdalanýǵa berilgen bolatyn.