Aqmolalyq dárigerler túıneme juqtyrǵan naýqastardyń jaǵdaıy týraly aıtty

KÓKShETAÝ. QazAqparat – Aqmola oblysynda túıneme juqtyrǵan 15 adam em alyp jatyr, onyń ishinde 13 naýqastyń jaǵdaıy ortasha, ekeýiniki jeńil. Bul týraly Esil ortalyq aýdandyq aýrýhanasy bas dárigeriniń mindetin atqarýshy Gúlnar Sársenbaeva málim etti, dep habarlaıdy QazAqparat tilshisi.

Dárigerdiń aıtýynsha, qazirgi kezde naýqastardyń jaǵdaıy jaqsaryp keledi, dene qyzýy túsken.

«Bizdiń aýrýhanaǵa alǵashqy kúni barlyǵy 15 adam tústi. Olar birden juqpaly aýrýlar bólimshesine jatqyzyldy. Arasynda aýyr kúıde jetkizilgen naýqastar da boldy. Dárigerlerdiń jedel qımylynyń arqasynda jaǵdaıdy turaqtandyrý múmkin boldy. Qazirgi kezde 13 naýqastyń jaǵdaıy ortasha deńgeıde, ekeýiniki jeńil. Dene qyzýy joq. Jaqyn kúnderi qorytyndy bakterıologııalyq zertteýden keıin shyǵara bastaımyz», - dep túsindirdi Esil ortalyq aýdandyq aýrýhanasy bas dárigeriniń mindetin atqarýshy Gúlnar Sársenbaeva QazAqparat tilshisiniń saýalyna.

Aıta ketsek, budan buryn Aqmola oblysynda turǵyndar túıneme juqtyrǵan aýylda karantın jarııalanǵanyn jazǵan edik.