Aqmolalyq 51 oqýshy «Myń bala» ulttyq olımpıadasynyń jeńimpazy atandy
«Myń bala» ulttyq olımpıadasy aýyldyq jerlerdegi neǵurlym qabiletti oqýshylardy anyqtaý, qoldaý jáne olarǵa arnaıy oqytý baǵdarlamalaryn uıymdastyrý arqyly áleýmettik lıft berý úshin ótkiziledi.
«Joba jyl saıyn aýyldyq jerlerdegi besinshi jáne altynshy synyptardyń eń qabiletti 1000 oqýshysyn anyqtap, olarǵa óz qurdastarymen tabysty básekelese otyryp, elimizdiń úzdik mektepterinde bilim alýǵa múmkindik beredi. 2021 jyly 24 aqpan men 27 naýryz aralyǵynda aýyl mektepteriniń oqýshylary arasyndaǵy «Myń bala» ulttyq olımpıadasyna qatysýǵa ótinimder qabyldandy. Aqmola oblysynan 7163 ótinim kelip tústi, onyń 6486-y testileýge jiberildi», - dep habarlady vedomstvodan.
Olımpıadanyń qatysýshylary birinshi kezeńniń keshendi testileýin tańdaýy boıynsha: qashyqtan onlaın rejıminde nemese jergilikti bilim berý organdary usynǵan arnaıy jabdyqtalǵan úı-jaılarda óte aldy. 2021 jylǵy 2-10 sáýir aralyǵynda Aqmola oblysynyń 6486 oqýshysy birinshi kezeńge qatysyp, logıkalyq jáne keńistiktik oılaýdy baǵalaý boıynsha testileýden ótti. Testileý Elbasy akademııasynyń platformasynda onlaın formatta ótkizildi.
«Testileý qorytyndysy boıynsha ekinshi kezeńge Aqmola oblysynyń 263 oqýshysy ótti. Ekinshi kezeń 2021 jylǵy 5 mamyrda barlyq sanıtarlyq-epıdemıologııalyq talaptardy saqtaı otyryp, «U-Study» óńirlik testileý ortalyqtarynyń bazasynda oflaın-rejımde uıymdastyryldy. Fınalıster matematıkalyq saýattylyq, qazaq tilinde oqytylatyn oqýshylar úshin qazaq tili, orys tilinde oqytylatyn oqýshylar úshin orys tili, aǵylshyn tili jáne jaratylystaný ǵylymdary boıynsha akademııalyq bilimdi baǵalaýǵa kompıýterlik testileýden ótti», - dep tolyqtyrdy vedomstvonyń baspasóz qyzmetindegiler.
Olımpıadanyń qorytyndy kezeńi boıynsha Aqmola oblysynan 51 oqýshy jeńimpaz atandy. Olardyń ishinde besinshi synyptardyń 27 oqýshysy, altynshy synyptardyń 24 oqýshysy bar. Eń joǵary nátıjelerdi Shortandy aýdany men Birjan sal aýdanynyń oqýshylary kórsetti. «Altynshy synypty bitirgen olımpıada jeńimpazdary Qazaqstan Respýblıkasy Bilim jáne ǵylym mınıstrliginiń kvotalaryna sáıkes «Bilim – ınnovatsııa» lıtseıleri men «Daryn» mektepterinde bilim alýǵa múmkindik alady. Altynshy synypty bitirgen olımpıada jeńimpazdary 8-16 maýsym aralyǵynda mamandandyrylǵan mektepterge ótinish berýi kerek», - dep tolyqtyrdy vedomstvodan.