Aqmolalyqtar Jeńis kúnin atap ótip jatyr
Sharaǵa qatysqan Aqmola oblysynyń ákimi Marat Ahmetjanov, oblystyq máslıhat depýtattary, oblys ákiminiń orynbasarlary, soǵys jáne eńbek ardagerleri, oblystyq jáne qalalyq kásiporyn-uıym, mekemelerdiń basshylary úrmeli aspaptar orkestiriniń súıemeldeýimen Dańq alleıasy boıymen júrip ótip, «Máńgilik alaý» eskertkishine gúl destelerin qoıdy. Saltanatty mıtıngide oblys basshysy Marat Ahmetjanov quttyqtaý sóz alyp, elimizdi zulym jaýdan qorǵap qalǵan ardagerlerdiń atyna izgi tilegin joldady.
«Memleket basshysy Qasym-Jomart Toqaev «Jeńis kúni – halqymyzdyń eren erligi men birliginiń, qaharmandyǵynyń sımvoly bolyp sanalady» dep aıtqan bolatyn. Babalarymyzdyń baǵa jetpes batyrlyǵynyń arqasynda – biz búgin beıbit elde, baqytty ómir súrip jatyrmyz. Búgin sol qasiretti soǵys jyldarynda qaza tapqandardyń, barlyq maıdandarda habarsyz ketkenderdiń, osy kúnge jete almaǵan babalar esimin eske alyp, urpaq paryzyn oryndaýǵa jınalyp otyrmyz. Jeńiske jetip, soǵystan keıin kúızelgen eldi kóterýge at salysqan, osy shýaqty kúnderge jetpegen azamattardyń jarqyn beınelerin qurmetpen eske alyp, bas ıemiz», - dedi Marat Ahmetjanov.
Aımaq basshysy atap ótkendeı, Aqmola oblysy halqynyń tórtten biri, ıaǵnı 90 myń adam maıdanǵa shaqyrylyp, onyń 37 myńnan sál astamy ǵana oraldy. Aqmolalyqtar barlyq maıdandarda soǵysyp, Máskeý, Stalıngrad, Kýrsk doǵasyndaǵy shaıqasqa qatysty. Onyń ishinde 66 aqmolalyq Keńes odaǵynyń Batyry jáne Dańq ordeniniń tolyq kavalerleri boldy. Qazirgi tańda óńirde 5 soǵys ardageri jáne 5 myńǵa jýyq tyl eńbekkeri turady.
Mıtıngte soǵysta sháıit bolǵan jandardy bir mınýttik únsizdikpen eske alyp, urys dalasynan oralmaǵan jaýyngerler rýhyna arnap aspanǵa qarýdan oq atyldy.
Jeńistiń 79 jyldyǵyna arnalǵan osy tektes is-sharalar oblystyń barlyq qalalary men aýdandarynda ótip jatyr.
Aıta ketsek, budan buryn Jeńis kúni qarsańynda aqmolalyq ardagerlerge 3 mln teńgeden beriletinin jazǵan edik.