Aqmolalyq pishenshiler qysqa 1,3 mln tonnaǵa jýyq jemshóp daıyndady

<p>Aqmolalyq pishenshiler 1,3 mln tonnaǵa jýyq shóp daıyndady. Bul &ndash; qolda bar mal úshin qajetti bir jyldyq jemshóp qorynyń 96,3 paıyzy. Bul týraly Aqmola oblystyq Aýyl sharýashylyǵy jáne jer qatynastary basqarmasy basshysynyń orynbasary Erkesh Álenov málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

Basqarma basshysy orynbasarynyń málimetinshe, qazir óńirde shóp shabý jumystary aıaqtalyp qaldy.

Qıyndyqtarǵa qaramastan malǵa qajetti jemshópti jınaýda aqmolalyq pishenshiler belsendilik tanytqan. 

– Bıyl oblys boıynsha sharýalar shamamen 458 myń iri qara, 250 myń jylqy, 569 myń qoı, 40 myń eshkini qystatqaly otyr. Osynsha malǵa 1 mln 308 myń tonna mal azyǵy qajet bolsa, sońǵy málimet boıynsha onyń 1 mln 260 myń tonnasy jınaldy. Bul – qolda bar mal úshin qajetti bir jyldyq jemshóp qorynyń 96,3 paıyzy, – deıdi Erkesh Álenov.

Aıtýynsha, kóktemnen beri jaýyn-shashyn bolmaǵandyqtan shabyndyqtaǵy shóp óspeı qalǵan.

Degenmen, jemshóppen tolyq qamtamasyz etý maqsatynda mal azyǵy ósiriletin alqap 28 myń gektarǵa ulǵaıtyldy, sóıtip jalpy alǵanda 223 myńnan astam gektardy qurady.

– Budan bólek, 156,8 myń tonna pishendeme jáne 139,6 myń tonna súrlem ázirlendi. Sonymen birge oblysta sharýashylyqtardy jemmen tolyq qamtamasyz etý qajettigin eskere otyryp qosymsha taǵy 750 myń tonna saban daıyndaý jumysy júrip jatyr, – dep túıindedi Erkesh Álenov.

Aıta ketsek, budan buryn Aqmola oblysynda egin oraǵy jumystary tolyq aıaqtalǵanyn jazǵan edik.

Óńir dıqandary ónimdilik tómen bolǵanyna qaramastan 3 mln tonnadan astam astyq jınady.