Aqmolalyq dıqandar egin oraǵyn tolyq aıaqtady

<p>Aqmola oblysynda kúzgi egin oraǵy jumystary aıaqtaldy. Óńir dıqandary ónimdilik tómen bolǵanyna qaramastan 3 mln tonnadan astam astyq jınady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Oblystyq aýyl sharýashylyǵy jáne jer qatynastary basqarmasynyń málimetinshe, aqmolalyq sharýalar úshin bıylǵy jyl ońaı bolǵan joq.

Kóktemdegi ylǵaldyń azdyǵy, jazdaǵy qurǵashylyq jáne tamyz-qyrkúıek aılaryndaǵy jaýyn-shashyn eginniń bitik shyǵýyna biraz kedergi keltirdi.

Odan qaldy, keıikter shaýyp biraz egin taptaldy.

Ásirese, egin oraǵy kezindegi jańbyrdan zalal kóp keldi, 2 mln 945 myń gektardyń egini kóktep ketti.

Sol úshin úkimet tarapynan 20 myń tonna janar-jaǵarmaı jáne 1 myń tonna gaz bólindi.

Osy qıyndyqtarǵa qaramastan sharýalar egin oraǵy naýqanyn ýaqtyly aıaqtap, bar altyn astyqty shashpaı-tókpeı jınap aldy.

Oblys boıynsha ortasha gektar berekesi 6,4 tsentnerden aınaldy.

— Bıylǵy jyl óńir dıqandary úshin úlken synaq boldy. Bıdaıdyń ósip shyǵýyna, pisýine jáne sapasyna kedergi keltirgen faktorlar oryn aldy. Úkimettiń der kezindegi kómegi jáne egin oraǵy naýqanyn uıymshyldyqpen ótkizýdiń arqasynda oblys dıqandary qysqa merzimniń ishinde kúzgi jıyn — terim jumystaryn aıaqtap, 3 mln tonnadan astam astyq jınady, — dedi oblystyq aýyl sharýashylyǵy jáne jer qatynastary basqarmasy basshysynyń orynbasary Erkesh Álenov.

Ol atap ótkendeı, qazirgi kezde keler jyldyń kóktemgi egisine qajetti tuqym qoryn jasaý jumystary qarqyndy júrgizilýde.

— Endigi mindet — astyqtyń elevatorlarǵa jóneltilýi men saqtalýyn qamtamasyz etý. Jalpy, oblysta sıymdylyǵy 4,8 mıllıon tonna bolatyn elevatorlar men sharýashylyqtarda 2,4 mıllıon tonnaǵa arnalǵan astyq qoımasyn daıyndaldy. Keler jylǵa jospar boıynsha 536 myń tonna tuqym qajet bolsa, onyń 268 myń tonnasyn nemese 50 paıyzyn qambaǵa quıyp aldyq, — dep túıindedi Erkesh Álenov.

Jalpy, bıyl oblystaǵy egistik kólemi 5,3 mln gektardy qurady.

Onyń ishinde 4,9 mln gektaryna dándi jáne dándi-burshaqty daqyldar, 197 myń gektarǵa maıly daqyl jáne 223,4 myń gektarǵa jemshóp egildi.

Aıta ketsek, budan buryn Aqmola oblysynda aptap ystyq pen jańbyr astyq shyǵymyna keri áser etkenin jazǵan edik.