Aqmolalyq dárigerler SQO turǵyndaryna kómek kórsetip jatyr

<p>KÓKShETAÝ. KAZINFORM - Aqmola jáne Soltústik Qazaqstan oblystarynyń basqarmalary arasyndaǵy tótenshe jaǵdaıda shuǵyl medıtsınalyq kómek kórsetý týraly kelisim sheńberinde Kókshetaý qalasynan sanıtarlyq avıatsııa dárigerleri Taıynsha aýdanynyń turǵyndaryna kómekke bardy.</p>

Aqmola oblysy densaýlyq saqtaý basqarmasynyń málimetinshe, sanıtarlyq avıatsııa jelisine júktiliktiń 28 aptasyndaǵy áıeldi shuǵyl kesar tiligi arqyly bosandyryp alý jóninde shaqyrtý túsken. Áıel eki balany dúnıege ákelgen, onyń biri salmaǵy 930 gramm ul bala da, ekinshisi salmaǵy 900 gramm qyz. Merziminen buryn týǵandyqtan nárestelerdiń ekeýiniń de salmaǵy tómen jáne tynys alýynda qıyndyqtar bolǵan.

Neonatolog - dáriger Tatıana Shafıgına men medbıke Marına Cherepashkova shuǵyl túrde kómekke keldi. Ul balany jaǵdaıy turaqtalǵan soń Kókshetaý qalasyndaǵy Aqmola oblystyq kópeıindi aýrýhanasynyń perınataldyq ortalyǵyna jetkizildi. Al egizdiń syńary qyz bala Taıynsha aýdandyq ortalyq aýrýhanasynda em qabyldap jatyr. Onda onyń densaýlyǵy boıynsha bilikti dárigerler táýlik boıy konsýltatsııa jasaýda. 

«Dárigerlerdiń yntymaqtastyǵy men kásibıligi tótenshe jaǵdaılar kezindegi kelisilgen is-qımyldardyń mańyzdylyǵyn bildirip qoımaıdy, sonymen birge, óńirdegi medıtsınalyq kómektiń joǵary deńgeıde ekenin kórsetedi», - dedi vedomstvodan.

Aıta ketsek, budan buryn Aqmola oblysynda sý basqan aýyldan naýqas áıel qaıyqpen qutqarylǵanyn jazǵan edik.