Aqmolalyq asyqshy kóshpendiler oıynyna qyzý daıyndalyp jatyr

<p>KÓKShETAÝ. KAZINFORM — Aqmola oblysynyń asyq atýdan aǵa jattyqtyrýshysy, joǵary sanatty bapker Samat Áýkenovtiń Qyrǵyzstanda ótken alǵashqy Dúnıejúzilik kóshpendiler oıyndaryna sportshy retinde qatysqanyna bıyl týra 10 jyl boldy. Ol kezde ol tórtinshi orynnan kóringen edi. Bıyl Astanada ótetin V Dúnıejúzilik kóshpendiler oıynynda Aqmola oblysynyń namysyn onyń 19 jastaǵy shákirti Kógershin Dýman qorǵaıdy.</p>

Foto: Oksana Matasova/Kazinform

Ulttyq ónerdi dáriptep kele jatqan asyqshy men onyń tájirıbeli jattyqtyrýshysy aldaǵy dodaǵa daıyndyǵy barysy týraly aıtyp, josparyn bilisti.

«Jasym on toǵyzda, Zerendi aýdanynyń Ortaǵash aýylynda týyp óstim. Qazir Kókshetaý qalasynda turamyn. Es bilgeli asyq oınap kelemin. Asyq atýdy alǵash ret anam úıretti. Kókshetaýda bapkerim Samat Áýkenovtiń asyq úıiremesine baryp, sheberligimdi shyńdaı tústim», — deıdi asyqshy qyz.

Foto: Oksana Matasova/Kazinform

Kókshetaý qalasyndaǵy medıtsınalyq kolledjin támámdaǵan keıipkerimiz keleshekte mamandyǵyn aýystyryp, dene shynyqtyrý pániniń muǵalimi bolýdy armandaıdy. 

Jattyqtyrýshysy Samat Áýkenovtiń aıtýynsha, Kógershiniń týǵan ápkesi Aılana da asyq atýdyń has sheberi, túrli jarystarda top jaryp júrgen asyqshy.

Alaıda, Kógershin Zerendi aýdany atynan qatysqan oqýshylar arasynda ótken jarystarda kózine túsken. Ol sheberligimen jáne jeńiske degen qulshynysymen erekshelendi.

«Kógershin 2023 jyly eń jaqsy nátıje kórsetti, sondyqtan 2024 jyly QR quramasyna tústi. Oblystyq deńgeıde ol árqashan birinshi oryndardy ıelendi. 2023 jyly Túrkııada ótken Eýrazııa kýbogynda 2-orynnan kórindi. 2023 jyldyń tamyz aıynda Pavlodarda Qazaqstan kýbogynda, qyrkúıek aıynda Rýmynııada Álem kýbogynda da chempıon atandy. Qazir ol — Aqmola oblysynda asyq atý oıyny boıynsha birinshi nómirli sportshy», — dep bólisti Samat Áýkenov.

Sportshynyń ózi bolsa, osy kúnge deıingi dúbirli dodalardaǵy búkil jetistikterine bapkerleriniń arqasynda qol jetkizdim dep otyr.

Qyrkúıek aıynda Qazaqstanda V Dúnıejúzilik kóshpendiler oıyndary ótedi.

Osy baıraqty jarysqa ulttyq qurama sapynda Kógershin Dýman da qatysyp, el namysyn qorǵaıdy. Ol osynaý jarysqa aqpan aıynan bastap tyńǵylyqty daıyndalý ústinde.

Foto: Oksana Matasova/Kazinform

Tamyzdyń 27-de Astana qalasyna attanyp, sonda besinshi, ıaǵnı jarys aldyndaǵy sońǵy daıyndyq jıynyn ótkizemiz. Buǵan deıin Almaty, Şýche, Petropavl jáne Túrkistanda daıyndaldyq. Kóńil kúıim jaqsy, bar kúsh-jigerimdi Kóshpendilerdiń dúnıejúzilik oıyndarynyń chempıony jáne Azııa chempıony bolýǵa saryp etemin», — dep qosty boıjetken.

Kógershinniń chempıon bolatynyna jattyqtyrýshysy da úlken senip artyp otyr. 

Eske salaıyq, budan buryn arqan tartystan ulttyq qurama qarsylastaryna arnaıy taktıka quryp jatqanyn jazǵan edik. 

Foto: Oksana Matasova/Kazinform