Aqmolalyq 60 bozbala Otan aldynda áskerı mindettin oryndaýǵa attandy
Reıhstagqa Jeńis týyn tikken qazaq, Halyq Qaharmany Rahymjan Qoshqarbaevtyń 100 jyldyǵyn jáne Keńes Odaǵynyń batyry, Halyq Qaharmany jáne Táýelsiz Qazaqstannyń Tuńǵysh Qorǵanys mınıstri Saǵadat Nurmaǵambetovtyń týǵanyna 100 jyl tolýyn merekeleýge arnalǵan shara Keńes Odaǵynyń eki márte batyry, ataqty qazaq ushqyshy, Qazaqstan Respýblıkasy avıatsııasynyń general-maıory Talǵat Begeldınovtiń eskertkishine gúl shoǵyn qoıý rásimimen bastaldy.
Saltanatty sharada Aqmola oblysy ishki saıasat basqarmasynyń basshysy Almas Alın quttyqtaý sóz sóılep, áskerge shaqyrýshylarǵa sát-sapar tiledi, sondaı-aq, Otan qorǵaýshylar kúniniń mańyzdylyǵyna toqtaldy.
«Otanǵa adal qyzmet etip, onyń halqyn qorǵaý ár er azamattyń áskerı boryshy jáne mindetti bolyp sanalady. Táýelsizdik jyldarynda Qazaqstanda jaýyngerlik qabiletti armııa quryldy. QR Qarýly Kúshteri zamanaýı tehnıkamen jaraqtandyrylyp, áskerı kadrlardyń sapasy artyp keledi. Sonymen birge, áskerı qyzmetshilerdiń áleýmettik máseleleri de birtindep sheshilýde. Oqý-jattyǵýlar únemi ótkizilip turady, onyń barysynda bizdiń ásker joǵary kásibı daıarlyqty, is-qımyldardyń úılesimdiligin jáne tamasha jaýyngerlik daǵdyny kórsetýde. Áskerimizdiń azamattarymyzdyń tynyshtyǵy men egemen elimizdiń shekarasyn qorǵaıtynyna senimdimiz. Osynyń arqasynda bizde beıbitshilik pen kelisimde ómir súrýge, balalardy tárbıeleýge jáne tynysh jumys isteýge múmkindik bar. QR Qarýly Kúshteri qataryndaǵy qyzmet árbir qazaqstandyqtyń qurmetti mindeti, aǵa urpaqtyń batyrlyq jaýyngerlik dástúrlerine negizdelgen patrıotızm mektebi boldy jáne bolyp qala beredi», - Almas Alın.
Sonymen qatar, jıynda Aqmola oblysynyń qorǵanys isteri jónindegi departamentiniń bastyǵy Talǵat Turabaı jáne «Qazaqstan Respýblıkasy Qarýly Kúshteriniń ardagerleri» qoǵamdyq birlestigi Aqmola oblystyq fılıalynyń tóraǵasy Janat Erejepov áskerge shaqyrýshylardy Otan aldynda adal bolýǵa, sondaı-aq, áskerı qyzmetti abyroımen atqarýǵa tilektestikterin bildirdi.
Ásker qataryna shaqyrylyp otyrǵandardyń arasynan iriktelip alynǵan 40 bozbala Astananyń irgesindegi Aqmol aýylynda ornalasqan QR Qarýly Kúshteri qatarynda áýe shabýylyna qarsy qorǵanys áskerlerine jatatyn 44813 á/b quramynda áskerı qyzmet óteıtin bolady.
«Іrikteý kezinde jastardyń moraldyq-psıhologııalyq qasıetterine, densaýlyq jaǵdaıyna basty nazar aýdaryldy. Barlyq áskerge shaqyrylýshylar Otan aldyndaǵy áskerı boryshtyń mańyzdylyǵyn túsinip, sanaly túrde qyzmet etýge barady. Biz Aqmola oblysynyń qorǵanys isteri jónindegi departamentine áskerge shaqyrylýshylardy ýaqtyly daıyndaǵany, sapaly irikteýi úshin alǵysymyzdy bildiremiz», - dedi 44813 áskerı bólim komandıriniń orynbasary Bolat Hámetov.
Budan bólek, áskerge shaqyrylýshy 20 bozbala Aqtaý qalasyna áskerı qyzmetin óteý úshin attanbaqshy. Shara barysynda Aqmola oblysy ákimniń atynan ásker qataryna shaqyrylǵandarǵa kerek-jaraqtar salynǵan áskerı sómke úlestirildi. Sonymen birge, jas urpaqty áskerı-patrıottyq tárbıeleýge qosqan úlesi úshin bir top áskerı qyzmetshiler men zapastaǵy ofıtserlerdi Aqmola oblysy ákiminiń alǵys hattarymen marapattaldy.
Aıta ketsek, budan buryn Qoshqarbaev pen Nurmaǵambetovtiń mereıtoıyna arnalǵan saptyq án baıqaýyna 350-ge jýyq adam qatysqanyn jazǵan edik.