Aqmoladaǵy tekserilgen 85 sý qoımasynyń 78-i shomylýǵa jaramdy - TJD

KÓKShETAÝ. QazAqparat - Aqmola oblysynda sýǵa shomylý maýsymyna belsendi daıyndyq júrip jatyr. Óńir qutqarýshylary barlyǵy 85 sý qoımasyn tekserdi, onyń 78-i shomylýǵa jaramdy dep tanyldy, dep habarlaıdy QazAqparat tilshisi.

Oblystyq TJD baspasóz qyzmetiniń málimetinshe, óńirde sýǵa shomylý maýsymy kezinde jaǵajaılarda kezekshilikti júzege asyratyn 120 qoǵamdyq qutqarýshyny daıyndadyq. Sonymen qatar, shomylý maýsymynda toǵyz jańa resmı jaǵajaıdyń ashylýy jáne jumys isteýi josparlanǵan, onyń altaýy — kommýnaldyq, úsheýi — jeke menshik.

«Óńir qutqarýshylary barlyǵy 85 sý qoımasyn tekserdi. Tekseris qorytyndysy boıynsha 78-i shomylýǵa jaramdy dep belgilendi. Osy rette, kommýnaldyq jaǵajaılarda kezekshilik tórt kólde – Zerendi, Şýche, Qopa jáne Býrabaıda júzege asyrylady. Sýdaǵy barlyq qural-jabdyqtar tehnıkalyq jaramdy kúıde, alaıda kóp nárse azamattardyń ózderiniń minez – qulqyna baılanysty», - dedi Aqmola oblysy TJD bastyǵynyń orynbasary Qaırat Qasym.

Aldyn alý aıasynda qutqarýshylar polıtsııa departamentimen jáne jergilikti atqarýshy organdarmen birlesip 4573 reıd júrgizdi, onyń qorytyndysy boıynsha 308 adam ákimshilik jaýapqa tartyldy.

«Oblystyń sý aıdyndarynda azamattardyń demalýy úshin qaýipsiz ınfraqurylym men jaǵdaı jasaý jumystary jalǵasýda jáne turaqty baqylaýda», - dedi Q.Qasym.

Aıta ketsek, budan buryn Aqmola oblysynda sýǵa batqan eki adamnyń denesi tabylǵanyn jazǵan bolatynbyz.