Aqmoladaǵy kásiporyndardyń eksporttyq áleýeti zor - Erjan Ashyqbaev

KÓKShETAÝ. QazAqparat - Aqmola oblysyndaǵy kásiporyndardyń eksporttyq áleýeti zor. Bul týraly Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty bıylǵy Joldaýyndaǵy mindetterdi halyqqa túsindirý maqsatynda Kókshetaý qalasyndaǵy birqatar óndiris oryndarynda bolǵan QR Syrtqy ister mınıstriniń orynbasary Erjan Ashyqbaev aıtty, dep habarlaıdy QazAqparat tilshisi.

Erjan Ashyqbaev aldymen Kókshetaýdaǵy polıetılen qaptaryn shyǵaratyn «Asyl arman» jaýapkershiligi shekteýli seriktestiginiń jumysymen tanysty. Alǵashynda «Novopek» keıin, «Asyl arman» bolyp ataýy ózgertilgen seriktestik Kókshetaýdaǵy irgeli kásiporyndardyń biri sanalady. Kásiporynnyń óndiris boıynsha dırektory Ánýarbek Omarbekovtyń sózinshe, búgingi tańda kásiporyn polıetılen, polıpropılen jáne kaltsıı karbonatynan joǵary sapaly ári memlekettik jáne halyqaralyq standarttarǵa saı túrli qapshyqtar shyǵarýdy jolǵa qoıǵan.

Kásiporynda 500 keliden eki tonnaǵa deıin sýsymaly júk tasıtyn 120 mıllıon dana qaptar men «Bıg-beg» konteınerleri tigilýde. Daıyn ónim negizinen elimizge, odan qaldy Reseı, Tájikstan jáne Ózbekstan elderine eksportqa shyǵarylady.

«Sońǵy jyldary elimizde shaǵyn jáne orta bıznesti, sondaı-aq, iri kásipkerlikti damytýǵa memleket tarapynan kóńil bólinýi jáne Eýrazııalyq ekonomıkalyq odaqtyń dúnıege kelýi bul bizdiń iskerlik belsendiligimizge úlken qoldaý bolyp, óndirisimizdiń ekonomıkalyq jaǵynan órkendeýine úlken úles qosyp otyr. Búgingi kúni kásiporynymyzda 700-ge jýyq biliktiligi joǵary mamandar jumys isteıdi. Fabrıka aıyna on mıllıonnan astam beriktiligi joǵary qaptar men júz myńǵa jýyq «Bıg-beg» konteınerlerin shyǵarady. Ónim Qazaqstannan basqa TMD elderi, Qytaı jáne ózge de shetelderde úlken suranysqa ıe. Qazaqstannyń ózge oblystarynan tiginshiler vahtalyq ádis boıynsha kelip jumys isteıdi. Olarǵa arnap toǵyz qabatty jatahana salyp jatyrmyz. Keleshekte óndiristi ulǵaıtyp, jumysshylar sanyn 2 myń adamǵa deıin jetkizý josparda bar», - deıdi óndiris boıynsha dırektory Ánýarbek Omarbekov.

Kásiporyn jumysymen tanysqan QR Syrtqy ister mınıstriniń orynbasary Aqmola oblysyndaǵy kásiporyndardyń eksporttyq áleýeti zor ekenin atap ótti.

«Búgingi saparymyzdyń maqsaty - Elbasynyń halyqqa arnaǵan Joldaýyn nasıhattaý bolsa, endi bir jaǵynan bul qujatta alǵa qoıylǵan mindetterdiń óńirlerde qalaı júzege asyrylyp jatqanyn kózben kórý edi. Ásirese, eksportpen aınalysatyn kásiporyndardyń jaǵdaıymen jaqyn tanysyp, syrtqy saýdada jańa naryqqa shyǵýyna, kórshi jáne Eýrazııalyq ekonomıkalyq odaq elderimen saýda baılanystaryn nyǵaıtýǵa atsalysý. Bul jaǵynan alǵanda Aqmola oblysyndaǵy kásiporyndardyń birazy básekelestikke saı jumys istep jatqandyǵy qýantady. Búgin kórip otyrǵanymyzdaı Reseıdegi qant qaptarynyń tórten úsh bóligin shyǵaratyn kásiporynnyń alar asýy alda», - dedi Erjan Ashyqbaev.

Sonymen qatar, QR Syrtqy ister mınıstriniń orynbasary aýyl sharýashylyǵy men kommýnaldyq tehnıkalardy qurastyratyn «Qazaqstan agroónerkásiptik ınnovatsııalyq korporatsııasy» jáne keramıkalyq kirpishter shyǵaratyn jáne «Enkı» kirpish zaýytynyń óndiris tsehtarynda da boldy.