Aqmolada «Jigit sultany» aımaqtyq baıqaýynyń júldegerleri anyqtaldy
Oblys ortalyǵynyń irgesindegi «Qulager» atshabarynda ótken baıqaýǵa Pavlodar, Soltústik Qazaqstan oblystarynan jáne Aqkól, Býrabaı, Bulandy, Egindikól, Jaqsy, Zerendi aýdandary men Astana, Qosshy, Kókshetaý qalalarynan 20-30 jas aralyǵyndaǵy 13 jigit qatysyp, ózara myqtyny anyqtady.
Birinshi kezeńde jigitter ózderin tanystyryp, ónerimen tań qaldyrdy, Birjan sal, Balýan Sholaqtyń ánderin oryndady.
Ekinshi kezeńde qatysýshylar jamby atý, aýdaryspaq, gir kóterý, armrestlıng jáne qazaq kúresi sııaqty sporttyq saıystarda eptilikteri men sheberlikterin kórsetip, kúsh synasty.
Eki kúnge sozylǵan baıqaý qorytyndysy boıynsha «Jigit sultany» aımaqtyq baıqaýdyń bas júldesin astanalyq Álı Rızabek jeńip aldy.
Zerendi aýdanynan Hamza Aıdyn «Ónerli jigit» atalymymen, Egindikól aýdanynan Táttimbek Aıbek «Bilekti jigit» atalymymen, taǵy bir egindikóldik Sanah Erkebulan «Qaısar jigit» atalymymen, Kókshetaý qalasynyń Krasnyı ıAr selosynan Ysqaq Aıbek «Jigerli jigit» atalymymen marapattaldy.
Jeńimpazdar men qatysýshylar uıymdastyrý komıtetiniń dıplomdary jáne aqshalaı sertıfıkattarymen marapattaldy.
Aıta ketsek, budan buryn Paralımpıada chempıony Davıd Degtıarev jańa páter jáne 25 mln teńgeniń aqshalaı sertıfıkatyna ıe bolǵanyn jazǵan edik.