Aqmolada veterınarııa ınspektory kásipkerlerden para aldy degen kúdikke ilindi

KÓKShETAÝ. QazAqparat - Aqmola oblysynda para alǵan veterınar ınspektor kúdikke alyndy. Bul týraly sybaılas jemqorlyqtyń sebepteri men jaǵdaılaryn joıý maqsatynda uıymdastyrylǵan onlaın beınekonferentsııa barysynda aıtyldy, dep habarlaıdy QazAqparat tilshisi Aqmola oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Qashyqtan ótken beınekonferentsııaǵa aýmaqtyq Sybaılas jemqorlyqqa qarsy qyzmet basshylyǵy, Veterınarııalyq baqylaý jáne qadaǵalaý komıtetiniń oblystyq, qalalyq jáne aýdandyq aýmaqtyq ınspektsııa ókilderi qatysty.

Kezdesý barysynda qatysýshylar Kókshetaý qalasynyń memlekettik sanıtarııa ınspektorlarynyń birine qatysty qylmystyq is aıasynda QR QPK 200-babynyń tártibinde engizilgen usynýdy qarady.

Atap aıtqanda, sotqa deıingi tergeý barysynda memlekettik qyzmetshi mindetti taýarǵa ilespe jáne ruqsat qujatynsyz bazar aýmaǵynda etti kedergisiz satqany úshin kásipkerlerden birneshe ret para alǵany anyqtaldy.

Joǵary turǵan basshylyqtyń tarapynan tıisti baqylaýdyń bolmaýy, veterınarııa salasyndaǵy zańnamanyń jáne basqa da birqatar zańnamalyq aktilerdiń talaptaryn tolyq elemeý, QR zańnamasyn buzýshylyqtarǵa jol bermeý boıynsha túsindirý jumystaryn júrgizýdiń bolmaýy osy sybaılas jemqorlyq quqyq buzýshylyqtardy jasaýǵa yqpal etti.

Kezdesý barysynda aýmaqtyq Sybaılas jemqorlyqqa qarsy is-qımyl departamentiniń basshysy Murat Tóleýbaev memlekettik qyzmetshilerge sybaılas jemqorlyqqa qarsy zańnamaǵa engizilgen jańashyldyqtardy túsindirip, memlekettik organdarda sybaılas jemqorlyqtyń aldyn alýdy tıisti túrde júrgizý qajettigin atap ótti.

«Bıyl veterınarııalyq baqylaý salasyndaǵy birneshe ret anyqtalǵan sybaılas jemqorlyq faktileri tıisti emes aldyn alý jumystaryn jáne basshylyq tarapynan baǵynyshtylarǵa baqylaýdyń joqtyǵyn kórsetedi. Veterınarııalyq qyzmet mamandary óz is-áreketiniń halyqtyń azyq-túlik qaýipsizdigi úshin qaýipti saldaryn sezinýi, al olardyń basshylary qyzmetkerlerdiń sybaılas jemqorlyqqa qarsy zańnamany saqtamaǵany úshin jeke jaýapty ekenin túsinýi tıis», - dedi Murat Tóleýbaev.