Aqmolada vaktsına almaǵan pedagogtar men personaldar bilim berý nysanyna kire almaıdy

KÓKShETAÝ. QazAqparat - Aqmola oblysynda 2021-2022 oqý jylynda bilim berý uıymdarynda koronavırýs ınfektsııasynyń aldyn alý boıynsha sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalardy júrgizý týraly qaýly shyqty, dep habarlaıdy QazAqparat tilshisi.

Oblystyń bas memlekettik sanıtarlyq dárigeriniń 2021 jylǵy 28 tamyzdaǵy №34 qaýlysynda (turaqty medıtsınalyq qarsy kórsetilimderi bar adamdardy, sońǵy 3 aı ishinde COVID-19-ben aýyryp saýyqqan adamdardy qospaǵanda) pedagogtar men personaldyń 100 paıyz vaktsınatsııalanýy, (turaqty medıtsınalyq qarsy kórsetilimderi bar adamdardy, sońǵy 3 aı ishinde COVID-19-ben aýyryp saýyqqan adamdardy qospaǵanda) ýaqytsha medıtsınalyq kórsetilimderi bar jáne vaktsınatsııadan ótpegen tulǵalar (7 kúnde 1 ret) mindetti túrde PTR- testileýden ótýi, sondaı-aq, uıymǵa kirý kezinde Ashyq qosymshasyn engizý (pedagogtardy, personaldy, ata-analardy (zańdy ókilderdi), 18 jastaǵy jáne odan asqan bilim alýshylardy QR kod boıynsha tirkeý qamtamasyz etilsin delingen.

Kópshiliktiń qatysýymen is-sharalar ótkizýge (mádenı, tárbıe, synyptan tys jáne ata-analar jınalystary jáne t. b.), mektepke deıingi jáne orta bilim berý uıymdarynda toptar men synyptardy biriktire otyryp is-sharalar ótkizýge tyıym salynǵan.

Al, bógde adamdardyń kirýine tyıym sala otyryp, COVID-19-ǵa qarsy vaktsınatsııa alǵan (18 jasqa tolmaǵan, sondaı-aq turaqty medıtsınalyq qarsy kórsetilimderi bar jáne sońǵy 3 aı ishinde COVID-19 aýyryp saýyqqan stýdentterdi jataqhanaǵa ornalastyrýǵa jol beriledi) stýdentterdi jataqhanaǵa ornalastyrýǵa ruqsat etiledi.

Budan bólek, oqý orny boıynsha aýmaqtyq medıtsınalyq uıymdardyń egý pýnktterinde (jyljymaly egý pýnktterin nemese kóshpeli egý brıgadalaryn qosa alǵanda) COVID-19-ǵa qarsy vaktsınatsııalaýdyń tolyq kýrsyn (ekinshi komponentpen) aıaqtamaǵan stýdentterge vaktsınatsııa júrgizýdi uıymdastyrý qajettigi aıtylǵan.

COVID-19-ǵa qarsy vaktsınatsııasy joq pedagogtar men personalǵa (turaqty medıtsınalyq qarsy kórsetilimderi bar, aýyryp jazylǵan adamdardy saýyqqannan keıin 3 aı ishinde qospaǵanda) kirýge ruqsat etilmeıdi.

Sonymen birge, qaýlyda synypta, bir aýysymnyń 30 paıyzdan astam synyptarynda, kolledjderde, joǵary oqý oryndarynda COVID-19 aýrýy tirkelgen kezde 14 kún boıy úı karantınine oqshaýlaý qarastyrylǵan.

Qaýly qol qoıylǵan kúninen bastap bastap kúshine enedi.