Aqmolada úzdik áleýmettik jobalar anyqtaldy

KÓKShETAÝ. QazAqparat - «Nur Otan» partııasynyń Aqmola oblystyq fılıalynda «Qazaqstannyń úzdik áleýmettik jobalary» dástúrli baıqaýynyń óńirlik kezeńiniń jeńimpazdary marapattaldy, dep habarlaıdy QazAqparat tilshisi.

Saltanatty rásimge partııa fılıaly tóraǵasynyń birinshi orynbasary Ǵalym Bekmaǵambetov pen Aqmola oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Dına Ahmetjanova qatysty.
Bıyl jetinshi ret ótkizilip otyrǵan baıqaýǵa oblystyń ár óńirinen 20 joba usynylypty. Onyń ishinde óńirlik kezeńderden keıin baıqaý komıssııasynyń sheshimimen 15 joba iriktelip, oblystyq kezeńge joldama alǵan. Jeńimpazdar men qatysýshylardy quttyqtaǵan Ǵalym Bekmaǵambetov baıqaýǵa qatysqan barlyq joba avtorlary jeńiske laıyq ekenin aıtyp, mundaı baıqaýdyń áleýmettik, rýhanı jáne tárbıelik mańyzy zor ekenin atap ótti. – Bul baıqaý áleýmettik salada belsendiligimen kózge túsken qoǵamdyq uıymdar men muqtaj jandarǵa kómek qolyn sozǵan jeke azamattarǵa qoldaý kórsetýge, olardyń eńbekterin elep-eskerýge múmkindik beredi, – dedi Ǵalym Bekmaǵambetov.

Óz kezeginde oblystyq jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova bul is-sharanyń qoǵamda teń múmkindikter qalyptastyrý jolynda ıgi dástúrge aınalǵanyn aıtty.
Baıqaý qorytyndysy boıynsha júldeli úshinshi oryn «Antı dámhana» jobasyn usynǵan kókshetaýlyq Anar Batyrálıeva men «Sheber ana» jobasyn usynǵan tselınogradtyq Aıgúl Raqymova, ekinshi oryn «Áleýmettik salada eriktiler qozǵalysyn damytý» jobasynyń avtory kókshetaýlyq Qalymtaı Sherıazdanov pen «Túzetý mekemesinen jazasyn ótep shyqqan azamattardy «Kıim tigý» jeke kásipkerligine jumysqa tartý» jobasynyń avtory ereımentaýlyq kásipker Ravıl Hýsnýtdınovqa buıyrdy.

Al, birinshi oryndy «Vera v dobro» jobasynyń avtory, kókshetaýlyq Tatıana Spıglazova jeńip aldy. Ol 1 mıllıon teńgeniń sertıfıkaty men baıqaýdyń respýblıkalyq kezeńine qatysý múmkindigine ıe boldy.
Budan bólek, baıqaýda belsendilik tanytqandar da baǵaly syılyqtarmen marapattaldy.