Aqmolada tıimsiz paıdalanylǵan 979 689 gektar jer anyqtaldy

KÓKShETAÝ. QazAqparat - Aqmola oblysynda tıimsiz paıdalanylǵan 979 689 gektar jer anyqtaldy. Bul týraly aımaq basshysy Málik Myrzalınniń tóraǵalyǵymen jer qatynastary salasyndaǵy máselelerge qatysty ótken apparat májilisinde aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.

Memleket basshysynyń jer resýrstaryn tıimdi paıdalaný týraly tapsyrmasyn oryndaý boıynsha Aqmola oblysynda aýqymdy jumystar júrgizilýde. Atalǵan másele boıynsha aımaq basshysynyń qatysýymen barlyq aýdandar men qalalarda aktıv jıyny ótti.

«Jerdi tıimdi paıdalaný memlekettiń basty mindeti. Atqarýshy organdar, jer paılanýshylar jerge janashyrlyqpen qaraýlary qajet.  Taǵy da qaıtalap aıtamyn, aýdan jáne qala ákimderi, quzyretti organdardyń basshylary jer zańnamasy normalarynyń buzylýyna jol bermeýleri tıis», dedi aımaq basshysy M.Myrzalın.

Aqmola oblystyq jer qatynastary basqarmasynyń basshysy Almagúl Qadyralınanyń málimeti boıynsha bıylǵy jyly tuńǵysh ret qolǵa alynyp otyrǵan ǵaryshtyq monıtorıng nátıjesinde óńirde tıimsiz paıdalanylǵan 979 689 gektar jer anyqtaldy. Bul jerlerdiń  276 364 gektarynda tekserý sharalary júrgizilip, 133 437 gektary aýyl sharýashylyǵy aınalamyna qaıtaryldy. Al paıdalanylmaı jatqan qalǵan jerlerdi qaıtaryp alý boıynsha memlekettik baqylaý júrgizetin organdar jumys isteýde.  

Sonymen qatar, alqaptardyń elektrondy kartasyn qalyptastyrý boıynsha jumystar da aıaqtalýǵa jaqyn.

Qazirgi kezde,  5 mıllıon 683 myń gektar egistik alqap nemese jospardyń 99,2 paıyzy tsıfrlandyryldy. Jyl sońyna deıin shabyndyqtar men jaılymdar tolyq tsıfrlandyrylady.

Al «Esil» áleýmettik-kásipkerlik korporatsııasy» UK» AQ Aqmola oblysynyń ınteraktıvti kartasy jobasyn júzege asyrý boıynsha jumystar júrgizýde. Bul elektrondy formatta ınvestıtsııalyq jobalar, bos jatqan jerler men ony alý úshin qujattar tapsyrý protsedýralary, sondaı-aq, qosylý úshin toraptary kórsetilgen ınjenerlik jelileri týraly málimetter ornalastyrylady.

 Qazirgi kezde Kókshetaý qalasynyń kartasy testik rejımde jumys isteýde. Aldaǵy ýaqytta barlyq aýdandardy qamtý kózdelgen. Jobalaýshylar atalmysh jobany júzege asyrý óńirde tsıfrlandyrý, ónerkásip, aýyl sharýashylyǵy jáne kásipkerlik qyzmettin  ońtaılandyrýda septigi mol dep otyr.

Májilisti qorytyndylaǵan aımaq basshysy aýdan jáne qala ákimderine paıdalanylmaı jatqan jerlerdi anyqtap, tıisti sharalar qoldaný týraly tapsyrma berdi.