Aqmolada tekserilgen balalar oıynshyqtarynyń 60 paıyzy normaǵa sáıkes kelmeıdi

KÓKShETAÝ. QazAqparat – Aqmola oblysynda ónerkásip taýarlaryna qatysty zańbuzýshylyqtardy joıý úshin kásipkerlik sýbektilerine 117 uıǵarym berildi, dep habarlaıdy QazAqparat tilshisi oblystyq sanıtarlyq-epıdemıologııalyq baqylaý departamenti baspasóz qyzmetine silteme jasap.

Vedomstvonyń málimetinshe, óńirde aǵymdaǵy jyldyń 8 aıynda ónim qaýipsizdigin monıtorıngileý sheńberinde 2788 ónim synamasy zertteldi.

Onyń ishinde 311 sáıkes kelmeıtin synama anyqtaldy, bul 11,1 paıyzdy qurady.

Zerttelgen úlgilerdiń jalpy kóleminen 87,9 paıyzy tańbalaý boıynsha tehnıkalyq reglamentterdiń talaptaryna jaýap bermeıdi, al qaýipsizdiktiń mıkrobıologııalyq kórsetkishteri boıynsha sáıkessizdik 5 paıyzdy, fızıka-hımııalyq kórsetkishter boıynsha 5,5 paıyzdy qurady.

«Zertteýmen ónimderdiń barlyq negizgi toptary qamtylǵan, onyń ishinde sút ónimderi, qus eti, et jáne balyq ónimderi, kondıterlik jáne nan-toqash ónimderi jáne basqa da ónimderi bar. Azyq-túlikke jatpaıtyn taýarlar tobynda balalar oıynshyqtary, kıim, aıaq kıim, turmystyq hımııa taýarlary, gıgıena quraldary, parfıýmerııa jáne kosmetıka, tamaqpen janasatyn materıaldar, balalar taýarlary jáne basqalary tekserildi», - dep atap ótti vedomstvodan.

Aqmola oblysy sanıtarlyq-epıdemıologııalyq baqylaý departamentiniń bólim basshysy Janar Qalıevanyń aıtýynsha, 1998 myńnan astam tamaq óniminiń synamasy zerttelgen.

Onyń 8,1 paıyzy belgilengen talaptarǵa sáıkes kelmeıdi.

Ónerkásiptik top taýarlaryna keletin bolsaq, kelesi taýar toptarynda sáıkessizdik anyqtaldy: balalar men jasóspirimderge arnalǵan taýarlar arasynda – 56,1 paıyz, onyń ishinde balalar oıynshyqtary – 60 paıyz, jeńil ónerkásip ónimderi – 91,4 paıyz, parfıýmerlik-kosmetıkalyq ónimder - 4,3 paıyz, turmystyq hımııa taýarlary - 4,2 paıyz.

«Osyǵan baılanysty kásipkerlik sýbektilerine anyqtalǵan zańbuzýshylyqtardy joıý týraly 117 uıǵarym berilip, ony joıý tártibi túsindirildi», - dep tolyqtyrdy vedomstvodan.