Aqmolada tártip saqshylary jetim qyzǵa tıesili páterdi qaıtarýǵa kómektesip jatyr

KÓKShETAÝ. QazAqparat - Býrabaı aýdandyq polıtsııa bóliminiń, aýdandyq prokýratýra organdary jáne ákimdik qyzmetkerleri birlesip, ata-anasynyń qamqorlyǵynsyz qalǵan 2001 jylǵy boıjetkenge jetim retinde memleket tarapynan berilgen páterin qaıtaryp berýge kómektesýde, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, bul týraly aqpannyń 10-da Býrabaı aýdandyq polıtsııa bólimine aýdandyq bilim bóliminiń qyzmetkerleri habarlaǵan.

2013 jyly zardap shegýshige soǵys ardagerleri, ınternatsıonalıst jaýyngerler jáne kópbalaly otbasylarmen qatar Şýchınsk qalasynda qalpyna keltirilgen 90 páterli turǵyn úıden baspana beriledi.

«Osy kezde jábirlenýshiniń ógeı aǵasy, 1993 jylǵy qaryndasyna qamqorshylyqty rásimdeıdi. Biraq memleketten alynǵan páterde aǵaly-qaryndas eki jyl ǵana birge turady. Qyz bala qamqorshysynyń dostarymen ishimdik ishýine jáne moraldyq qysymyna shydaı almaı týystaryna ketedi. Sol kezeńde ógeı aǵa qaryndasyna qamqor bolýdan bas tartady jáne páterdi beıtanys adamdarǵa jalǵa beredi» deıdi vedomstvodan.

Qazirgi ýaqytta quqyq qorǵaý jáne atqarýshy organdardyń qyzmetkerleri turǵyn úıdiń zańdy ıesi retinde jábirlenýshiniń quqyqtaryn qalpyna keltirý úshin qajetti jáne rastaıtyn qujattardy jınaýmen aınalysýda.

«Osyǵan baılanysty Qylmystyq kodekstiń 142-baby boıynsha sotqa deıingi is qozǵalyp, tergeý sharalary júrgizilýde. Kúdiktige qatysty «kelý týraly mindetteme» protsessýaldyq sharasy tańdaldy», - dep toldyqtyrdy vedomstvodan.