Aqmolada sybaılas jemqorlyqqa qarsy saıasat tujyrymdamasynyń jobasy talqylandy
Sharaǵa óńirdiń memlekettik organdarynyń basshylary, qalalar men aýdandardyń ákimderi, máslıhat depýtattary, qoǵam qaıratkerleri jáne BAQ ókilderi qatysty.
Kún tártibindegi basty másele - Memleket basshysynyń tapsyrmalaryn oryndaý aıasynda ázirlengen 2022-2026 jyldarǵa arnalǵan Sybaılas jemqorlyqqa qarsy saıasat tujyrymdamasy jobasynyń negizgi erejelerin talqylaý boldy.
Komıssııa otyrysynda sóz sóıleý barysynda Sybaılas jemqorlyqqa qarsy óńirlik vedomstvonyń basshysy Arman Rahımov strategııalyq qujattyń ózektiligi men mańyzdylyǵyn atap ótip, qatysýshylardy tujyrymdamany ázirleýge óz úlesin qosýǵa shaqyrdy.
«Halyqaralyq ozyq tájirıbeni, qoǵam men bıznes ókilderiniń, sarapshylardyń pikirlerin, azamattardyń usynystaryn, sondaı-aq sybaılas jemqorlyq táýekelderine syrtqy taldaýdyń qorytyndylaryn eskere otyryp, aldaǵy 5 jylǵa arnalǵan Tujyrymdamanyń jobasy ázirlendi. Qujatta sybaılas jemqorlyqqa qarsy is-qımyl sheńberindegi mańyzdy jetistikter jáne memlekettiń sybaılas jemqorlyqqa qarsy saıasatyn jetildirýdiń odan ári baǵdarlary usynylǵan. Sonymen qatar, búgin biz sybaılas jemqorlyqqa qarsy is - qımylda azamattyq belsendilik tanytýǵa daıyn árbir adamnyń pikirin tyńdaý jáne eskerý úshin jınalyp otyrmyz», - dedi Arman Rahımov.
Otyrysqa qatysýshylarǵa 7 bólimnen turatyn Tujyrymdama jobasynyń mazmuny tanystyryldy.
Sybaılas jemqorlyqqa qarsy saıasatty odan ári damytýdyń paıymy qujattyń besinshi bóliminde baıandalǵan, onda parasatty qoǵamdy qalyptastyrý, sybaılas jemqorlyqtyń sebepterin barynsha azaıtý, sybaılas jemqorlyq úshin jaýapkershiliktiń bultartpastyǵyn qamtamasyz etý, sybaılas jemqorlyqtyń aldyn-alýǵa azamattyq qoǵamdy tartý, sybaılas jemqorlyqqa qarsy saıasat monıtorıngi máseleleri, sondaı-aq Antıkor qyzmetin jetildirý máseleleri kórsetilgen.
Aıta keteıik, oblystyń árbir turǵyny adal.com.kz arnaıy qurylǵan saıty arqyly tujyrymdama jobasyn jetildirý boıynsha óz usynystaryn engize alady.
Sonymen qatar, jıynda «Aqmola – adaldyq alańy» jobalyq keńsesiniń jetekshisi, oblys ákiminiń sybaılas jemqorlyqqa qarsy is-qımyl máseleleri boıynsha shtattan tys keńesshisi Samıra Taıtenova parasatty qalyptastyrý jónindegi keshendi jospardy iske asyrý sheńberinde jergilikti atqarýshy organdardyń júrgizip jatqan qyzmeti týraly baıandady.
Kezdesý qorytyndysy boıynsha jergilikti atqarýshy organdardyń basshylyǵyna Memleket basshysy qoıǵan sybaılas jemqorlyqqa qarsy kúrestiń aldyn alý sharalaryn kúsheıtý jónindegi mindetterdi iske asyrý sheńberindegi jumysty jandandyrý tapsyryldy.