Aqmolada sý tasqynynyń aldyn alýǵa qyzý daıyndyq júrip jatyr

KÓKShETAÝ. QazAqparat - Aqmola oblysynda kóktemgi sý tasqynyna qyzý daıyndyq jumystary júrgizilýde. Apatty boldyrmaý úshin óńirdegi eldi mekenderde jergilikti bılik pen qutqarýshylar birlesip, qar tazalaý jáne bógetter turǵyzý sııaqty sharalardy qolǵa alýda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Sý tasqynynyń aldyn alý maqsatynda ótken jyldyń jazynan bastap oblysta Kókshetaý qalasy men 14 aýdandaǵy eldi mekenderde ınjenerlik qorǵaý boıynsha is-sharalar ótkizildi.

Bul sý burý arnalaryn jaılastyrý, keńeıtý jáne tereńdetý, 22 myń ózen arnasyn tazartý, 27 km astam sý burý arnasyn tazartý, bógetterdi topyraqpen nyǵaıtý jáne ulǵaıtý, 10 km astam bógetterdi jóndeý, 20 birlik sý ótkizý qurylystaryn jaılastyrý sııaqty sharalar.

Eldi mekenderden qar shyǵarý jumystary belsendi júrgizilýde. Qazirdiń ózinde 313 myń tekshe metr qar shyǵaryldy.

Tótenshe jaǵdaılar departamenti basshysynyń orynbasary Qanat Dospaevtyń aıtýynsha, keıbir eldi mekenderde aýa raıyna baılanysty sý basý qaýpi saqtalady.

«Jol kartasy is - sharalary men basqa da josparlardyń oryndalýy 20 eldi mekendi sý basý qaýpin tolyǵymen joıýǵa jáne sý tasqyny áserine ushyraǵan 80 eldi mekendi azaıtýǵa múmkindik berdi», - dedi Qanat Dospaev.

Sý tasqyny jaǵdaıynyń yqtımal kúrdelenýine jedel áreket etý úshin vedomstvoǵa qarasty bólimshelerdiń kúshteri men quraldary ázirlendi.

Onyń ishinde 2598 adam, 1067 tehnıka, 248 motopompa, 12 motorly qaıyq jáne 35 júzý quraldary bar.