Aqmolada sý tasqynynan keıin dalada qalǵan 216 otbasyna páter satyp alyndy
Aqmola oblysy ákimdiginiń málimetinshe, bıylǵy sý tasqyny kezinde Kókshetaý qalasynda jáne Atbasar, Bulandy, Jarqaıyń, Esil, Astrahan aýdandarynda barlyǵy 1265 úı zardap shekken.
«Búgingi tańda oblys boıynsha sý tasqynynyń saldaryn joıý boıynsha jumystar belsendi júrgizilip jatyr. Barlyq zardap shekken otbasylarǵa jergilikti bıýdjet esebinen birjolǵy áleýmettik kómek tólendi. Múliktik zalaldyń ótemaqysyn kezeń-kezeńimen tóleý jalǵasýda. Qazirgi ýaqytta 554 otbasyna tólem jasaldy. Sonymen birge, zardap shekken 412 adamǵa úıin jóndeýge materıaldyq kómek kórsetildi. Úıleri apatty dep tanylǵan 216 otbasyna „Asar Aqmola“ qorynyń qarajaty esebinen páter satyp alyndy», — dep túsindirdi vedomstvodan.
Buǵan qosa, óńirde múliktik zalaldy óteýmen qatar, demeýshilik kómek esebinen olardy qaýipsiz aımaqtarǵa kóshirý boıynsha jumys júrgizilip jatyr.
«Ol úshin Atbasarda eki kóppáterli turǵyn úıdiń qurylysy aıaqtalyp, taǵy bir turǵyn úıdiń qurylysy bastaldy. Onyń ishinde bir úıdi 1 tamyzǵa, ekinshisin 15 tamyzǵa, úshinshi úıdi jyl sońyna deıin aıaqtaý josparlanǵan. Úlgilik jobaǵa sáıkes, úsh aýdanda 107 jeke úıdiń qurylysy qolǵa alynǵan, onyń ishinde Bulandy aýdanynda — 56 úı, Jarqaıyń aýdanynda — 30 jáne Esil aýdanynda — 21 úı bar. Jaqyn arada Bulandy aýdanynda taǵy 59 úı salý jumysy bastalady», — dep tolyqtyrdy ákimdikten.
Ákimdikten atap ótkendeı, sý tasqyny kezinde mal shyǵynyn óteý jóninde ótinish túsken joq.
Bul baǵyttaǵy jumys jalǵasyp jatyr.
Eske salaıyq, munyń aldynda tasqyn sýdan zardap shekken Atbasar aýdany men Kókshetaý turǵyndary baspanaly bolǵan edi.