Aqmolada polıpropılen qapshyq óndiretin kásiporyn TMD naryǵyn baǵyndyrmaq

KÓKShETAÝ. QazAqparat - Kókshetaýda 2013 jyly Indýstrııalandyrý kartasy sheńberinde iske qosylǵan «Asyl arman» JShS (Novopek) polıpropılen qap (bir rettik qoldanylatyn shaǵyn jáne Bıg-Beg qaptary) shyǵarý boıynsha naryqta kósh bastap tur, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Búgingi kúni kompanııa Kedendik odaq talaptaryna saı keletin, sapaly ónimderdi shyǵaryp, Reseı, Tájikstan, Ózbekstan elderine saýdalaıdy. Aldaǵy ýaqytta TMD naryǵyna shyǵý josparda bar.

Eýropa, Taıvan elderinen ákelingen qazirgi zamanǵy jabdyqtarmen jaraqtalǵan kásiporynda un, qant, tuz, jarma, tsement, mys kontsentraty, ferroeritindi sııaqty ónimder salýǵa qoldanylatyn polıpropılen qaptar óndiriledi. Tehnologııa dúnıejúzilik standarttarǵa saı. Kásiporyn basshysy Rústem Ýsmanovtyń sózinshe, óndiris orny 32 myń sharshy metr aýmaqty alyp jatyr. Onda 600-den astam adam eńbek etedi. Kásiporynnyń jyldyq qýaty 10 mıllıonnan astam dana qap shyǵarýǵa jetedi.

«Keleshekte bıg-beg qaptaryn shyǵaratyn taǵy 20 stanok ornatý josparlanǵan. Bul óndiris qýatyn 60 paıyzǵa arttyrýǵa múmkindik beredi», - deıdi Rústem Ýsmanov.

Kásiporyn basshysy óndiris ornynda suranys joǵary jeńil qaptardy shyǵarý boıynsha joba ázirlenip jatqanyn atap ótti. 2019 jyldyń mamyrynda jyldyq qýaty 1,7 mıllıon dana daıyn ónim shyǵaratyn «Kókshe Sity» jańa óndiris orny iske qosylyp, 95 jańa jumys orny ashyldy.