Aqmolada orta mektep tyıym salynǵanyna qaramastan keńse jıhazyn satyp alǵan

KÓKShETAÝ. QazAqparat - Aqmola oblysynda orta mektep keńse jıhazyn negizsiz satyp alǵan. Bul týraly Antikor ortalyǵy alańynda ótken onlaın-brıfıngte «Aqmola - adaldyq alańy» jobalyq keńsesiniń jetekshisi Samıra Taıtenova aıtty, dep habarlaıdy QazAqparat.

Spıkerdiń aqparaty boıynsha, Aqmola oblysynda bıýdjet qarajatynyń tıimdi paıdalanylýyn baqylaý maqsatynda turǵyndardyń biri Publicbudget.kz ashyq bıýdjetterdiń ınteraktıvti kartasynyń saıtyna óz betinshe monıtorıng júrgizgen.

Monıtorıng barysynda Býrabaı aýdanynyń orta mektebi jalpy somasy 65 000 teńgege keńse jıhazdaryn satyp alýdy josparlaǵany anyqtaldy, alaıda bıýdjet qarajatyn tıimdi jumsaý jáne únemdeý rejımin kúsheıtý maqsatynda mamyr aıynan bastap jergilikti atqarýshy organdardyń keńse jıhazyn satyp alýyna ýaqytsha tyıym salyndy.

«Osyǵan baılanysty azamat oqý ornyna shaǵym túsirdi, alaıda mektep bul jıhazdy satyp alǵany belgili boldy. Ótinish negizinde anyqtalǵan buzýshylyqtar úshin Býrabaı aýdanynyń bilim bólimi bilim mekemesiniń laýazymdy tulǵasyn tártiptik jazaǵa tartty», - dedi Samıra Taıtenova.

Spıker atap ótkendeı, bul mysal - memlekettik organdardyń halyqpen keri baılanysynyń ornatylýynyń jáne azamattardyń ótinishterine jedel den qoıýdyń aıǵaǵy. Al ınteraktıvti karta memleket pen qoǵam arasyndaǵy ózara is-qımyldyń tıimdi dıalogtyq platformasyna aınalady.

Aıta keteıik, árbir turǵyn Ashyq bıýdjetterdiń ınteraktıvti kartasy arqyly mektepterdiń, balabaqshalardyń, aýrýhanalardyń, emhanalardyń, óńir joldarynyń bıýdjet aqshasynyń biryńǵaı platformada qalaı, ne úshin jáne qansha mólsherde jumsalatynyn kóre alady, sondaı-aq ashyqtyqty qadaǵalap, onyń damýyna áser ete alady.