Aqmolada oqýshylar arasynda KVI juqtyrý kórsetkishi tómendep keledi

KÓKShETAÝ. QazAqparat – Aqmola oblysynda oqýshylar arasynda koronavırýsty ınfektsııamen syrqattaný tómendedi. Qashyqtan oqytý formatyna aýystyrylǵan synyptar joq. Bul týraly brıfıngte oblystyń bas memlekettik sanıtar dárigeri Aınagúl Mýsına aıtty, dep habarlaıdy QazAqparat tilshisi.

Epıdemıologtardyń baǵalaýynsha aqmolalyqtardyń aýrý juqtyrý kórsetkishi úsh jarym ese tómendegen. Sońǵy aptada 722 jaǵdaıǵa az tirkeldi.

Degenmen, oqýshylar arasynda da koronavırýs ınfektsııasyn juqtyrý jaǵdaılary bar.

«Búgingi tańda oqýshylar arasynda koronavırýs ınfektsııasyn juqtyrý kórsetkishi tómendegeni baıqalady. Kúnine 10 jaǵdaıǵa deıin tirkeledi. Sońǵy táýlikte bul kórsetkish jetige tústi. Búginde qashyqtan oqytý formatyna kóshirilgen synyptar joq», - dedi Aınagúl Mýsına.

Mektep jasyna deıingi balalar arasynda sońǵy táýlikte juqtyrý oqıǵalary tirkelgen joq.

Oblystyń bas memlekettik sanıtar dárigeri atap ótkendeı, bul sanattaǵy balalar koronavırýs ınfektsııasymen aýyra bastady.

Sonymen birge, ol júrgizilip jatqan vaktsınatsııa jáne revaktsınatsııa naýqanyn eske saldy.

«Komırnatı vaktsınasynyń tolyq kýrsyn 139 júkti áıel aldy. Budan bólek, laktatsııa kezindegi 1 587 áıelge, 12-17 jas aralyǵyndaǵy 4 673 jasóspirimge vaktsına salyndy», - dep tolyqtyrdy Aınagúl Mýsına.

Eske sala ketsek, «Komırnatı» vaktsınasyn alatyn tulǵalar kontıngenti keńeıtildi. Olardyń arasynda birinshi, ekinshi jáne úshinshi toptaǵy múgedektigi bar adamdar, sondaı-aq vaktsınanyń birinshi dozasyn shetelde alǵandar bar.

Jalpy, revaktsınatsııadan 92 839 aqmolalyq ótti, bul - tıisti halyqtyń 43,2 paıyzy.