Aqmolada memorgandardy ońtaılandyrý esebinen 126 mln teńge únemdeldi

KÓKShETAÝ. QazAqparat - Aqmola oblysynda memlekettik organdardy ońtaılandyrý esebinen 126 mıllıon teńge únemdeldi, dep habarlaıdy QazAqparat tilshisi oblystyq Sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń málimetishe, QR Sybaılas jemqorlyqqa qarsy is-qımyl agentiginiń tóraǵasy Alık Shpekbaevtyń bastamasymen elimizdiń barlyq óńirlerinde memleket organdardy ońtaılandyrý arqyly shyǵyn kólemin azaıtý jumystary júrgizilýde.

«Agenttik keltirgen málimetterge qaraǵanda Aqmola oblysynda memlekettik organdar jáne vedomstvoaralyq uıymdardy ońtaılandyrý boıynsha uqsas fýnktsııalarǵa naqty usynysy bar monıtorıng júrgizildi.

Ońtaılandyrý nátıjesi boıynsha oblystyq basqarmalardyń sany 26-dan 22-ge deıin azaıdy. Sonymen qatar, basshylyq laýazymdardyń sany da eki esege kemidi. Buryn eki oryndaýshyǵa bir basshydan kelse, qazir qazir 5 oryndaýshyǵa 1 basshysy. Osynyń nátıjesinde 39 mıllıon teńge qarajat únemdeldi», - dep aıtty vedomstvodan.

Osyndaı monıtorıng bilim salasynda da júrgizildi. Nátıjesinde uqsas fýnktsııalary bar 8 kolledj qaıta quryldy. Bir eldi-mekendegi kolledjder sany 4-ke qysqartyldy. Ekonomıkalyq tıimdilik 87,4 mıllıon teńgeni qurady.

«Aýdandyq deńgeıde ońtaılandyrý arqyly erikti bólimderdi 247 den 163-ke deıin azaıtý josparlanǵan (84 nemese 34 paıyzǵa)», - dep tolyqtyrdy vedomstvodan.

Aqmola oblysy boıynsha sybaılas jemqorlyqqa qarsy is-qımyl departamentiniń málimetinshe, ońtaılandyrý bıýdjet qarajatyn únemdeýge ǵana emes, memlekettik organdardaǵy bıýrokratııany da azaıtýǵa múmkindik beredi.